Kaosaren teoria
Metahaven
2024ko Otsailaren 22tik
2024ko Ekainaren 09ra
Metahaven izenez ezagutzen da Vinca Kruk eta Daniel van der Velden artista nederlandarrek osatzen duten bikote ospetsua. 2007an sortu zuten kolektiboa, eta haren lanek erraz gainditzen dituzte artearen eta diseinuaren mugak. Filmak, eszenografia eta objektu grafikoak, tresna digitalak eta diskurtso teorikoa bezalako baliabideak erabiltzen ditu Metahavenek, eta forma-sortzaile eraginkortzat jotzen da gaur egun; forma horietan hezurmamitzen da, hain zuzen ere, post-humanismoa deritzona. Kolektiboaren praktika transdiziplinarrak nazioarteko errekonozimendua jaso izan du, eta bakarkako erakusketak eskaini dizkiote MoMA PS1, Stedelijk Museum, ICA London edo Minneapoliseko Walker Art Center bezalako erakundeek. Azken ekoizpen zinematografikoen artean, Kaosaren teoria (Chaos Theory, 2021) ikus-entzunezko poema hunkigarria dago, bi ahizpa gazteren arteko elkarrizketan eta haien bilakaeretan oinarritua: X (Valentina Di Mondo) eta Y/Z (Georgina David/Lucie de Bréchard). Adinak mundu garaikideari eta haren fenomeno ulertezinei aurre egitera daramatzan heinean, protagonistek gure bizimodua eta bizikidetza definitzen dituzten afektuak azaltzen dituzte. Gure ziurtasunak sendotzera bideratutako hizkuntza narratibo konbentzionala saihestuz, Kaosaren teoriak samurtasuna eta eztitasuna erabiltzen ditu zapaltzen dugun lurra bera ere zalantzan jartzera bultzatzeko.
Zalantzan jartze horren ondorioa ez da nahasmendua edo gatazka eragitea, baizik eta enpatia areagotzea: "Zer da oraina / zer da fisikoa / poza bera bezala?". Filmeko protagonistetako batek, Clarice Lispector idazlea parafraseatuz, gauzetan barrena egindako bidaia bat aipatzen du, eta obra hau definitzeko balio dezake, hain zuzen ere, aipu horrek. Egituraren, konposizio kromatikoaren eta soinu-muntaiaren bidez, Metahavenen piezak irudien eta pertzepzioaren ekologia moduko batean sartzen gaitu Gediminas Zygus konpositore lituaniarraren partitura magistralaren laguntzarekin.
Aretoa:103
Komisarioa: Manuel Cirauqui
Guggenheim Bilbao | Abandoibarra Etorb., 2 - Bilbo (Bizkaia)
Metahaven kolektiboaren 'Kaosaren teoria' jarri du ikusgai Guggenheimek
Ots. 27 | Iñigo Astiz [BERRIA.eus]
Erakusketaren irekierak bat egin du Bilboko museoaren Films & Video aretoaren hamargarren urteurrenarekin.