Dime si conmigo quiere hacer travesuras.

"Travieso" zulatutako gorputzaren eta horren emaitza estetikoaren azterlana da. Gorputz eskultoriko baten egoera itzulezina aztertu da, erreferentzia moduan piercinga hartuta, erakusketan apunte gisa azaltzen diren hainbat keinu adierazkor sortzeko.

Sarritan, artelanak egitean, pieza batean behin betiko eragitearen beldur gara, pieza horrekin dagoeneko lortu duguna galtzeak izutzen gaituelako. Balizko porrotera hurbiltzen garen bitartean,apurtu nahi dugu, batetik, sortzeko prozesuan sentitutako atxikimenduarekin eta, bestetik, hasierako ideiarekin konforme geratzearekin.Bihurrikeria egin nahi da: nilonezko oihala edo goma zeharkatu, horren forma betirako aldatzeko. Eta, aldi berean, eragindako aldaketaren presentzia iraunarazi nahi dugu piercingaren zeharkagailua kentzen dugunean.

Piercinga gorputzean egin daitekeen eraldaketa minimoa da, eta errebeldia ekintzatzat jotzen da. Ezin da bereizi bere alderdi estetikoaz: zuloa denboraz itxi badaiteke ere, beti izango da beste zerbaitekin espazioa konpartitu izanaren lekuko. Lotuta izan diren gorputzek elkarrengandik ikasten dituzte forma eta joerak, banandu ostean ere mantentzen direnak.

Erakusketan tamaina handiko piercingak aurkituko ditugu, egiturazko izaera hartzen dutenak likrazko oihal, goma eta apar-gomazko gorputz arin eta hauskorren gainean; horrela, apaingarri edo osagarri dena ezinbesteko egitura-elementu bihurtuko da. Zuloarekiko interesa atzematen da, baina baita begibistako pieza borobilak lotzen dituen azalaren azpian izkututako barrarekikoa ere. Izan ere, izkututa dagoenak eta begibistan dagoenak keinu bera osatzen dute.

— Travesuras - Nicky Jam

Ordutegiak: Asteartetik larunbatera: 11:00 - 14:00 / 17:00 - 20:00 | Igande eta jaiegunetan: 11:00 - 14:00