Montehermoso kulturuneak eta EHUren Arte Ederren Fakultateak lau proiektu aukeratu dituzte ikasleentzako deialdiaren azken edizioan. Gasteizko Udalak eta Arte Ederren Fakultateak sorkuntzaren alorreko azken joerei zabalkundea emateko sinatu zuten hitzarmenaren barruan kokatzen da deialdia.

Hautatutako proiektuak erakusketa programan txertatuz, Montehermoso kulturuneak profesionalizatzeko bidean dauden sortzaileen lanak ikustarazten laguntzen du, eta lanerako plataforma eskaintzen die haiei mundu profesionalera hurbiltzeko, eta bide batez sortzaileek eta gizarteak lotura zuzena egiten dute elkarren artean.

Buztingintzako tornuaren inguruko ikerketa teoriko eta praktiko batetik abiatuta, tornuak erreminta utilitario izatetik esplorazio artistikoko gailu izaterainoko eraldaketa aztertzen du Lorenak. Edmund de Waal edo Alexander Calder erreferenteen eraginpean, eremu hedatutzat ulertzen du zeramika, non forma, keinua eta egitura espazioarekin harremanean dauden.

Materialaren berezko hauskortasunak eta beste elementu batzuekin duen interakzioak hizkuntza estetikoaren funtsezko zati bihurtzen dituzte inperfekzioa, errorea eta kolapso-posibilitatea.

Lorena Aduna (Gasteiz, 1995)

Artista bisuala da Lorena Aduna Larriba. Errioxako Haro herrian hazi zen eta Arte Ederretan graduatu zen pinturako aipamenarekin Salamancako Unibertsitatean (2019-2023), SICUE mugikortasun bat egin zuelarik Bartzelonako Unibertsitatean 2022an. 2024an Zeramikako Masterra (Artea eta Funtzioa) bukatu zuen EHU Euskal Herriko Unibertsitatean.

Pinturaren, zeramikaren eta objektu-formen artean garatzen da bere praktika, betiere jarduera horiek entsegu- eta eraldaketa-prozesu gisa ulertuta. Materia igurtzitik lantzen du kontrolaren eta halabeharraren artean, zenbait gairi erreparatuz, hala nola testurari, gogortasunari, bolumenari, errepikapenari eta higadurari. Egitearen denborekiko, eskuzkoarekiko eta egiturazkoarekiko agertzen duen interesak zeharkatzen du bere lana, non keinuak eta materialtasunak pentsamendu-dispositibo gisa funtzionatzen duten.

Hainbat lehiaketatan hautatua izan da, hala nola NACE azokako Pieza Bakanaren XVII. Lehiaketan (2025) eta Vital Fundazioaren Arte Vital Lehiaketan (2023), eta argazkilaritzako Ohorezko Aipamen bat lortu zuen San Marcos Sarien XXVI. Edizioan.

Amalgama elkarteko kidea da, eta bertatik parte hartzen du antolakuntza-lanetan eta Caja Rioja Fundazioaren laguntzarekin egindako erakusketa kolektiboetan, hala nola Arte Sucio (2025) eta Amalgama de azules (2026) erakusketen kasuan, baita Dureza de Cuero (2024) erakusketaren kasuan ere, Bizkaiko Batzar Nagusietan.