Adamsek askotariko esparruak lantzen ditu, hala nola ehun-gaiak, eskultura eta instalazioa, eta horietan sokak, bihiak, alanbrea eta aurkitutako objektuak erabiltzen ditu —horiek dituzten asoziazio sentsorial eta kulturalekin—, arrazaren, erlijioaren, sexualitatearen eta oroimenaren arteko loturak islatzen dituzten gainazal konplexuak sortzeko.

Hautsa harrotzen: Gorputzaren artxiboa erakusketa murgiltzailea eta introspektiboa da aldi berean; presentzia materiala ematen die indar ikusezinei —oroimenari, erritmoari, enpatiari—, eta ehuntzeko jarduera gorputz-ekintza eta ekintza kolektibo gisa aurkezten du.

Hegoafrikako Ipar Lurmuturreko probintzian dagoen O'okiep hirian —hots, amaren familiaren sorlekuan— Garage Dance Ensemble konpainiarekin duen lankidetzari esker ehuntzeko ekintzaren eta dantzaren arteko elkarrizketa sorrarazi du.

in situ

Guggenheim Bilbao Museoak atsegin handiz aurkezten du in situ: Igshaan Adams. Hautsa harrotzen: Gorputzaren artxiboa erakusketa, Museoaren in situ erakusketa-zikloko hirugarrena. Ziklo horretan, Museoak areto jakin baterako pentsatutako eta eraikinaren arkitekturarekin elkarrizketa bat sortaraziko duten obrak sortzera gonbidatzen ditu artistak. in situ artista garaikide nabarmenek asmo handiko proiektuak egitera akuilatzeko plataforma gisa sortu zen, eta eskulturaren, instalazio-artearen eta multimediaren aukerak zabaltzen dituzten obrak aurkezten ditu. Erakusketa bakoitzak hartzen duen espazioarekin elkarreragiten du zuzenean, eta arkitektura eta irudimen artistikoa elkartzen diren ingurune bihurtzen du espazio hori.