Eraikuntza-materialen jatorrian eta hiriaren eta material horiek datozen lekuen arteko harremanean oinarritutako praktika luze batetik abiatuta, Almarzegiren azken proiektuek berriki sortutako materialak dituzte ardatz: hartxintxarrak, hareak eta hondakinak, baita horiek osatzen dituzten espazioak ere. Eskala espekulatibo handiko lanak dira, sarritan geologoekin eta meatzaritza-institutuekin elkarlanean eginak.

Erakusketak berriki sortu diren lursailen auzia planteatzen du. Eraispenen edo harrobiko lanen ondorengo metaketa txikiak, edota materialen desplazamenduak sortutako eremu zabalak, hala nola meatzaritzako eskonbrategiak edo dragatze-hareak. Ibaien ibilguen aldaketek ere formazio berriak sortzen dituzte, hareatzak edo uharteak adibidez. Oraindik definitu gabe dauden espazio horiek, Almarzegirentzat, haien existentzia tenporala eta etorkizuna zalantzan jartzeko lekua dira.

Die Halden in Deutschland (Alemaniako eskonbrategiak). Herrialdeko eskonbrategi handienen bolumenaren kalkulu itzela da, osatzen duten lursailaren bolumen osoa estimatzeko. Halleko (Saale) Kunstmuseum Moritzburg-eko 17 metro luzeko horma baterako ekoitzia, lanak Alemaniako meatzaritzaren historian azken 175 urteetan mugitutako harkaitz esterilek sortutako hondakin-bolumen handiaren kalkulua aurkezten du, lursail horien potentzialari buruzko galderak eginez. Bolumen handieneko eskonbrategiak oraindik aktibo dauden potasa eta lignito meatzaritzaren parte dira. Sophienhöhe, 2.200 milioi m³ lignito-hondakinekin, Alemaniako eskonbrategirik handiena da.

Gauzatu gabeko proiektuen marrazkiek, erakusketa edo biurtekoen testuinguruan eginak, ibai, aintzira eta itsasoetatik datorren eraikuntza-harearekin egindako instalazioak proposatzen dituzte. Dragatze-industriak harea kopuru izugarriak mugitzen ditu, harea-formazio berriak sortuz. Marrazkiak dira gauzatu gabeko proiektu horietatik geratu den gauza bakarra, batez ere pisu-arazoengatik, eta materialaren errealitate fisikoaren, eraikitako espazioaren eta lursailaren arteko harreman konplexuak erakusten dituzte.

Nondik datoz Bilbo eraikitzeko beharrezkoak diren materialak? Zer harreman dago hormigoiaren aridoen eta jatorrizko lekuen artean? Calcárea proiektua Mañariako harrobian gertatzen da. Material geologiko oso zaharrago bat behatzeko gonbidapenean datza, haren extrakzioa egitear dagoela. Duela 115 milioi urte sortu zenetik, arroka hori mendiaren barnean ezkutatuta egon da, eta proiektuaren parte gisa soilik ikus daiteke egun batzuetan, Bilboko eraikuntzan erabiltzeko prozesatu aurretik.

Nasher Sculpture Center-ek ekoitzia, Buried House proiektua Dallas hego-ekialdeko eraisteko zegoen etxe batean burutu zen. Eraispenaren ondoren, Almarzegik etxearen hondakinak lorategian lurperatu zituen, materialen jatorri geologikoari erreferentzia eginez. Horrela, hiri-eraldaketan dagoen auzo batean, etxearen aztarnek lekuaren iraganari, orainari eta etorkizunari buruzko hausnarketa osatzen zuten.