Ziudadelako Labea.

Eskuz puztutako beira gardenezko esferak eta altzairu herdoilgaitzezko kablea. "la Caixa" Fundazioaren Arte Garaikideko Bilduma.

Web Labea Aretoko espazio zirkularrean esekita, arkitekturak inguratu egiten gaituela sentiarazten digu instalazioak. Obra altzairuzko kableek eta beira gardenezko esfera hauskor eta distiratsuek osatutako amaraun bat da, eta lekuaren gaineko pertzepzioa aldatu, eta espazioarekiko harreman fisikoa aktibatzen du.

Instalazioak Mona Hatoumen obran agertzen diren tentsio nagusietako batzuk biltzen ditu: erakarpena eta mehatxua, fintasuna eta indarkeria, babesa eta itxialdia. Gure gainean esekitako amaraunaren xehetasuna liluragarria da, arretaz irundako egitura perfektua duelako, eta, aldi berean, harrapaketa-sare bat gogorarazten digu. Amaraunaren presentzia erakargarria eta kezkagarria da aldi berean.Beirazko esferek ihintz-tantak edo konstelazio bat dakarkigute gogora. Haien edertasun distiratsuak sare ikusezin batean harrapatuta geratzeko arriskuarekin kontrastatzen du. Hala, geldiarazi, elkartu eta batzuetan lotu egiten gaituzten egituren irudi poetiko eta aztoragarri bihurtzen du Web obrak elementu ezagun bat.

Mona Hatoum

Mona Hatoumek baliabide sorta zabalarekin lan egin du: performancea, bideoa, argazkia, eskultura, instalazioa eta paper gaineko lanak, besteak beste. Haren lanak lekualdatzeari, marjinazioari, bazterkeriari eta kontrol sozial eta politikoko sistemei buruzko gaiak jorratzen ditu.

Hatoum familia palestinar batean jaio zen, Beiruten, Libanon, 1952an. 1975ean Londresera egindako bisita labur batean, Libanoko Gerra Zibilaren eztandaren ondorioz, ezin izan zuen etxera itzuli. Harrezkero Londresen bizi da.

Egin berri dituen banakako erakusketen artean daude Parisko Pompidou Zentroak antolatutako atzera begirako erakusketa handi bat (2015), gerora Londresko Tate Modernen eta Helsinkiko KIASMAn erakutsi zena (2016), eta Estatu Batuetako atzera begirako bat Houstongo Menil Collectionen (2017) egin zena eta gero San Luiseko Pulitzer Arts Foundationen erakutsi zena (2018). 2022ko irailean, Hatoumek aldi bereko hiru bakarkako erakusketa aurkeztu zituen Berlinen, hiru egoitza hauetan: n.b.k., Georg Kolbe Museum eta KINDL. Bakarkako erakusketa zabala antolatu zen KAdEn, Amersfoorten (2025), eta haren lana Giacomettirenarekin batera erakutsi zen Londresko Barbicanen (2025). 2026aren hasieran, instalazio espezifiko bat sortu zuen Fondazione Pradako Zisterna eraikinerako.

Parte hartu duen nazioarteko erakusketa kolektiboen artean daude Veneziako Bienala (1995, 2005), Istanbulgo Bienala (1995, 2011), Documenta, Kassel (2002, 2017), Sydneyko Bienala (2006), Sharjah Bienala (2007, 2023) eta Taipeiko Bienala (2025).