Soinua, hitza eta arkitektura uztartzen dituen panoramika zabal honek, artistarekin elkarlan estuan garatuak, goitik behera hartuko ditu Guggenheim Bilbao Museoko hainbat areto, eta boterearen hizkuntzarekin buruz buru jarriko dituen ingurune ezin bereziagoan murgilduko ditu ikusleak.

Erakusketak Krugerren lan goiztiar adierazgarrietako batzuk berraztertzen ditu —haren paste-up pieza ospetsuak esaterako—, eta artistaren irismen formal eta kontzeptuala zabaltzen jarraitzen duten bideo eta pieza digital berriak ere biltzen ditu.

Elkar hartutako iturri ugaritatik edanda —diskurtso politikoak, publizitate-esloganak, erlijio-doktrinak, Interneteko jargoia—, Krugerren lanek hausnarketa zorrotz eta burutsuak egiten dituzte gaur egun gure bizitza baldintzatzen duten sistemen inguruan.

Sin título (Bidea) (2025), Bilboko paisaia linguistikoa iradokitzen duen lan berri zirraragarria, erakusketa hartzen duten aretoak konektatzen dituen hari bisuala da, Museoko Atrio nagusiaren inguruan taxututako ibilbide bihurgunetsua, nolabait.

Barbara Kruger artistari eskainitako panoramika zabala aurkezten du Guggenheim Bilbao Museoak. Asmo handiko erakusketa da, Krugerrek lau hamarkada baino gehiagotan irudien, hizkuntzaren eta boterearen inguruan egindako azterlan erradikalak biltzen dituena. Occident etxeak babestua, Barbara Kruger: Another day. Another night. erakusketak analisi sakona eskaintzen du artista honen lanak —masa-komunikabideetan eta iruzkin kulturaletan sakon errotuak— aro digitalean izan duen eboluzioa erakusteko.