Hasieran biologiaren arloko prestakuntza jasoa eta Schmelzdahin (Desagertu/Urtu) zinema esperimentaleko kolektiboan aritua 1980ko hamarkadan, Jochen Lempertek (Moers, Alemania, 1958) hainbat ezagutza-modu eta irudikapen-forma aztertu ditu bere praktika artistikoan, argazkigintzaren bidez "natura" —zentzurik zabalenean hartuta— behatzeko eta atzemateko duen modua markatu dutenak. Nolanahi ere, irudiak atzemateko zeregin hori, kameraren kliskagailua sakatzetik harago, gela iluneraino hedatzen da. Han errebelatzen ditu bere film negatiboak, eta handitzen eta inprimatzen bere lanak, askotarikoak: argazkiak (negatiboetatik abiatuta egindako kopiak), fotogramak (landareak edo animaliak paper fotosentikorrarekin kontaktuan jarrita lortutako inprimatzeak), "foliogramak" (argazki-handigailuaren negatibo-euskarrian denbora batez, hainbat orduz batzuetan, utzitako hostoak, haien xehetasunak paperera transmititu daitezen) eta luminogramak (argi-iturri batek argazki-filmean edo -paperean utzitako aztarnak sortzen dituen irudiak).

Lempertek gela ilunean erabilitako metodologia esperimentalek, horien emaitza inprimatuek eta haiek erakusketa-gune jakin batean erakusteko moduak naturaren irudikapena dute ardatz, baina baita irudikapenaren natura (hots, izaera) ere. Horrek ez du esan nahi Lemperten lanak modernitateak "natura" deitu duen hori zuzenean begien aurrera ekartzen digunik; Auzia mendebaldeko gizateriak —gehienbat hirietan antolatuta— naturarekin duen harreman konplexuaren barruan sortzen da, haien artean irekitako arrakala sakonaren ondorio dena. Lempertek irudiak sortzeko prozesuan erakusten duen artisautza-maila handiak eta obraren materialtasunak zalantzan jartzen dute naturaren izatasuna bera eta noraino naturak gizakiok kultura deitzen dugun horrekin duen lotura.

Local Ecology izenburuak erakusketako lan-multzo jakin bat izendatzen du, Arabara egindako bisitan ateratako argazkiak biltzen dituena, hain zuzen. Izan ere, Lempertek egonaldi bat egin zuen Araban, eta, besteak beste, Gasteiz hiria, eraztun berdea, Añanako eskualdea eta Atauriko asfalto-meategi abandonatua eta inguruak ezagutu zituen.

Komisarioa: Catalina Lozano