Erakusketan, zazpi mendetan zehar egindako marrazki eta estanpei buruzko ikuspegi zabala eskaintzen da, XV. mendetik hasi eta gaur egunera arte, eta artista handien lanak biltzen dira, besteak beste honako hauenak: Albrecht Dürer, Leonardo da Vinci, Rafael, Rembrandt, Francisco de Goya, Miklós Barabás, Henri de Toulouse Lautrec, Pablo Picasso, Egon Schiele, Victor Vasarely, Vera Molnár, Judit Reigl, Dóra Maurer, Georg Baselitz, Katharina Grosse eta Gerhard Richter.

Erakusketa hau Guggenheim Bilbao Museoaren eta Budapesteko Arte Ederren Museoa–Hungariako Galeria Nazionalaren arteko lankidetzari esker antolatu da. Izen handiko erakundea da azken hori, Antzinarotik XXI. mendera arteko nazioarteko arte-altxorrak dituena, eta haren marrazki eta estanparik preziatuenen nazioarteko aurkezpena da honakoa. 150 maisulan inguru aukeratu dira mende luzeetako marrazketa- eta estanpa-tradizioen erakusle, eta hautaketak agerian jartzen du teknika horien etengabeko berrikuntza-nahia, baita haien aniztasun teknikoa, ezaugarri nagusiak eta efektu estetiko bereizgarriak ere.