Maider Lópezen orain arteko bakarkako erakusketarik handiena aurkeztu dute
Artistaren 25 proiektu biltzen ditu erakusketak, horietako asko oraindik gurean ikusi ez direnak, eta nazioarteko lanaren azken hamarkada barne hartzen du. Erakusketaren izenburuak artistak lan egiten duen testuinguruak ukitu eta eraldatzeko ahalmenari egiten dio erreferentzia, baita artearen alderdi afektiboari ere.
| 24 Octobre 2025
Kutxa Fundazioa Kuboren 25. urteurrena eta Tabakaleraren 10. urteurrena dela eta, bi erakundeek Ukitu erakusketa aurkeztu dute, Maider López artista donostiarrak orain arte egin duen bakarkako erakusketarik handiena; aldi berean egongo da ikusgai bi egoitzetan. Erakusketa Kutxa Fundazioa Kuboren 25. urteurrena eta Tabakaleraren hamargarren urteurrena ospatzeko antolatu da, bi erakundeen arteko lankidetza berritzaile gisa. Erakusketak 25 proiektu biltzen ditu, artistaren nazioarteko lanaren azken hamarkadakoak, eta aurreko lanak ere berreskuratzen ditu, testuingurua emateko eta lotura berriak sortzeko. Proiektu horietako batzuk lehenengo aldiz erakutsiko dira.
Hiri- eta natura-inguruneetan —eraikinak, plazak, mendiak, hondartzak edo ibaiak— esku hartzearen bidez garatzen du lana Maider Lópezek; ekintza batzuk eskala handikoak dira eta beste batzuk sotilagoak. Besteekin eta ingurunearekin dugun harremana aldatzera gonbidatzen gaituzten obrak dira, maiz ikuslearen parte-hartzea behar dutenak: kolektibitateak sortzen dituzten ekintza publikoetatik hasi eta artistak behatu eta erregistratzen dituen egoeretaraino.
Erakusketaren izenburuak, Ukitu, ukitzeko eta ukitua izateko gaitasunari eta artearen dimentsio afektiboari egiten die erreferentzia, baita artistak esku hartzen duen testuinguruen eraldaketari ere. Pertzepzio-, interakzio- eta kolektibitate-maila desberdinak lotzen dituen ekosistema gisa funtzionatzen du erakusketak.
Tabakalerako eta Kutxa Fundazioa Kuboko erakusketaren bi zatiak osagarriak dira, eta, elkarrekin, ekosistema bakarra osatzen dute; besteei eta elkarri eragiteko maila ezberdinak lotzen ditu.
Egitarau publikoa eta argitalpena
Erakusketa osatzeko, jarduera-programa publiko bat antolatu da: bisita solasaldiak eta gidatuak, familientzako saioak (Inés Bermejok zuzenduta) eta arte lantegiak, eta arte garaikideko saio bat Tabakalerako erakusketa-aretoan bertan, Juntura kooperatibaren eskutik. Horrez gain, Aimar Arriola komisarioak gidatutako bisita bat egingo da erakusketaren bi egoitzetan barrena.
Era berean, artistaren azken hamarkadako lana dokumentatzen duen argitalpena ere izango du erakusketak, Dalpinek argitaratua. Aimar Arriolaren saiakera bat eta Maider López eta Hans Ulrich Obrist arte kritikari eta nazioarteko komisarioaren arteko solasaldia barne hartzen ditu.
Biografia
Maider Lópezek (Donostia, 1975) nazioarteko ibilbidea du: Veneziako Bienaletan (2005), Istanbulen (2013) eta Sharjah-n (2009) parte hartu du, baita bakarkako erakusketetan ere, hala nola hauetan: Tocar el Museu (Museu Museu d'Art Modern, Tarragona, 2024), Arnasa (Bilboko Arte Ederren Museoa, 2022), Art is Happening (Statens Konstrad, Suedia, 2019), eta Polder Cup (Skor and Witte de With, Herbehereak, 2010). Bere lanak, besteak beste, Guggenheim Bilbao Museoa, Artium, Kutxa Fundazioa, Koç Foundation eta Towada Art Centerreko bildumetan daude.
