Guggenheim Urdaibai Stop plataformak deituta, milaka lagun elkartu dira larunbat honetan, hilak 28, Gernika-Lumoko Pasealekutik abiatutako manifestazioan. Proiektuari ezezko borobila ematera irten dira manifestariak kalera: "Dena ez da dirua, Urdaibai ez dago salgai" gisako aldarrikapenak plazaratu dituzte, eta entzungor egiten ari diren erakunde zein alderdiei "ardura har dezaten" eskatu diete. Herritarrek eta bestelako eragile sozialek ere "babesa eta atxikimendua" adierazi nahi izan dute.

Busturialdeko herritarrak kezkatuta agertu dira Urdaibaiko biosferaren erreserban proiektu honek sorraraziko duen "inpaktu izugarriaren" aurrean. Jakina da egitasmo honek bi eraikin nagusi izango dituela, bai eta "bide berde" batez lotuta egongo direla: bata Gernika-Lumon, Dalia estalki enpresa zaharraren lurretan, eta bestea Muruetako ontziolan.

Gernikako Pasealekutik abiatuta, herriguneko erdialdea zeharkatu ondoren, Foru Plazan burutu da manifestazioa eta Aitor Etxebarriazarraga bertsolari Gernikarra izan da manifestua irakurtzeko ardura izan duena. Ezer baino lehen, garbi utzi nahi izan du Guggenheim Fundazioak proposatu eta hauspotutako proiektua dela, eta "itzalpean ezkutatzen diren" Bizkaiko Foru Aldundiaren, Eusko Jaurlaritzaren eta Espainiako Estatuaren babespean aurrera eramana. Ildo horretan, berretsi du "premia pribatu bati" erantzuten diola eta "inposizio osoz" egindako proiektua dela. "Bakar batzuen burutapenak gauzatzeko eta poltsiko jakin batzuk betetzeko, guztion dirua baliatu nahi dute", gaineratu du bertsolariak.

Ageriko kalteak

Plataformako kideek emandako datuen arabera, aurreikusten da Urdaibaiko erreserbako Guggenheimproiektuak 140.000 bisitari ekarriko dituela urtero-urtero, udako hiru hilabeteetan. Busturialdeko herritarrek salatu dute horrek "desiragarriak ez diren ondorioak" ekarriko dituela: "Larriki eragingo die mugikortasunari, etxebizitzen prezioei, eguneroko bizimoldeari, hizkuntzari edota kulturari".

Eskualdearen etorkizuna "guztion artean" eraiki beharra nabarmendu du Etxebarriazarragak: "Etorkizun horrek pertsonen bizitza eta natura erdigunean eduki behar ditu; dena ez da dirua, Urdaibai ez dago salgai". Administrazio publikoei, erakundeei eta alderdiei eskakizun zehatza egin diote plataformatik: "Geratu bihar bertan zentzurik gabeko proiektu suntsitzaile eta zapaltzaile hau".