Get Me A Stone erakusketak Rosalind Nashashibiren (Londres, 1973) margolan batzuk aurkezten ditu, 2021 eta 2026 bitartean ekoitziak, eta Occupation of The Inner Life (2026) pelikula. Lan horiek Gazako Zerrendaren egungo egoerarekiko artistaren inplikazio afektiboa eta politikoa islatzen dute.

Nashashibik bere lanean darabiltzan bi bitarteko nagusiak —zinema eta pintura— elkarrekin oso loturik daudela agerikoa izan arren, aipatutako sailaren kasuan bada zerbait pinturak indar bereziarekin azaleratzen duena eta azken bi urte eta erdian ikusi ditugun irudien basakeria indargabetzen duena, indarkeria horren beharrezko aitorpenari bizkarra eman gabe.

Bada ekintza piktorikoan sortzen den espazio bat irudikapena gainditzen duena. Espazio horretan sinbolikoa adierazpen hutsa gainditzeko modu gisa agertzen da, baina baita afektuak —kokalekuak— aktibatzeko modu gisa ere. Nashashibiren ustez, pinturaren historiak konposizioari buruzko etengabeko hausnarketa eskaintzen du, obra jakin batzuk agertzen diren une historikoei dagokienez. Baina pintura, agian, distantzian irauten duenarekin harremanetan jartzeko modu bat ere bada, erbesteak ezartzen duen distantzia lantzeko modu bat.

Izenburuan aipatzen diren harriak erresistentzia-sinboloak dira. Margolan batzuetan eskuak ageri dira harriei eusten, menderatzaileari aurre egiteko lehenengo keinu gisa. Harriek, mineralek, bizitza egiten den arkitektura bat eraikitzen dute, baina okupazioaren zapalkuntzaren aurrean matxinatzeko espazio bat ere ematen dute.

Historiak eta oroimenak materialtasun batzuk ehuntzen dituzte Nashashibiren obran, jarraitutasunaren ideia bat berresten duten mamuzko uneak eraikitzen dituen egunerokotasuna, determinismoei aurre egiten dien denborazkotasunarena, etorkizun baten baieztapenari eusteko beharrezkoa dena. Oheek, arropak, UNRWAren siglek, ehundura lausoz egindako paisaia urrun eta etengabe bat osatzen dute.

Get Me A Stone erakusketan Occupation of The Inner Life (2026) pelikula ere agertzen da margolaritzaren jarduna —bai ekoizpen-prozesuan, bai ikusgai jartzean—, familia-egoerekin lotzen duena eta, azken batean, zeregin artistikoaren eta konpromiso politikoen azpian dauden afektuak aipatzen dituena.

Rosalind Nashashibik 2021ean bere filmografiako bi pieza erakutsi zituen Artium Museoan, Z Aretoa programaren esparruan, erakusketa prestatzeko egonaldian egindako A Wider Kind of Love margolanarekin batera. Lan hori 2023an sartu zen museoaren funtsetan. Duela gutxi erositako Nashashibiren Electrical Gaza (2015) filma ere bildumaren parte da. Bi lan horiek museoko A2 Aretoan daude ikusgai gaur egun, Zirkulu batetik begira begiraden zirkulu batean talde-erakusketan.

Get Me A Stone erakusketa dela-eta, Artium Museoak #Hitzak sailaren 30. alea argitaratu du, Rosalind Nashashibiren lanaren inguruan. Komisarioen ekarpenez gain, argitalpenak Elena Narbutaitè (Vilna, Lituania, 1984) artistaren bi testu jasotzen ditu, bat oraingoa eta bestea lehen aldiz 2025eko azaroan Londresko Royal College of Art-en draught aldizkari digitalaren 1. zenbakian argitaratua.

Erakusketaren inaugurazioan, Rosalind Nashashibiren eta Mahmoud Alshaer editore, komisario eta poeta gazatarraren arteko elkarrizketa izango da gaur, 18:00etan, museoan, AMA Ikasketa Zentroaren bosgarren mintegiaren barruan. Programa honen parte ere bada gaur goizean gertatzen ari den Un límite a la fuerza lantegia, Amador Fernández-Savater (Madril, 1974) filosofoak gidatuta.

Bigen Zupiriak aurkezpenetik alde egin behar izan du

Hala Bedi hedabideak jakinarazi duenez Bingen Zupiri Eusko Jaurlaritzako Segurtasun sailburua aurkezpen ekitaldira joan zen. Horrek bertan zeudenen artean ezinegona eragin zuen (bereziki eta are gehiago artistaren familia eta lanaren ardatza ezagututa).

Arabako hedabideak bertan zegoen baten lekukotasuna ekarri du: "Ekitaldia hasteko artistaren bideo bat eman dute. Ondoren, (…)solasaldia hasi aurretik, publikoko emakume bat aurreratu eta bere ezinegona adierazi du egoera horretan". Ikusleak argiki erran zuen "ezin dela han egon Bingen Zupiria Segurtasun sailburua bertan ikusita; eta Flotillako kideen kontrako indarkeriaren arduradun nagusia han lasai eserita nolatan egon zitekeen galdetu zuen, guztion aurrean", Loiuko gertakariei erreferentzia eginez.

Aretotik alde egiteko egin zuen proposamenari kontra-proposamena bota zuen beste ikusle batek: "norbaitek alde egitekotan sailburuak egin behar duela alde, ez beste guztiok". Orduan altxatu eta alde egin zuen sailburuak.