Gerediaga Elkarteak antolatutako erakusketa honen helburua izan da 1936ko gerrak Durangaldean utzi dituen arrastoen bilduma egitea. Triskantza hura gertatu zenetik urte asko igaro diren arren eta irabazleek hura begien aurretik nahiz memoriatik ezabatzen saiatu ziren arren, gaur egun uste baino lorratz gehiago ikus ditzakegu gure inguruan.

Laburbilduz, bisitariak honako irudi hauek ikusiko ditu: gerrari zuzen loturikoak (azpiegiturak, armak eta paisaiak), bonbardaketek utzitako aztarnak (metraila eta bonba-zuloak), hildakoen presentzia (oroigarriak eta gorpuzkiak) eta oroimen-ekitaldiak.

Erakusketa hau aitzakia paregabea da iraganeko atal ilun hura gogoratzeko eta gai latz hari, beti bezala historiaren disziplinatik begiratu beharrean, behaketa zuzena egiteko.

— Jesus Mari Arruabarrena