— Diziplina anitzeko euskal artista da, Geografian eta Historian lizentziaduna (Deustuko Unibertsitatea, 1989). Askotariko ekoizpen artistiko esperimentalean aritu izan da bizitza osoa.

Marrazkiak, pinturak, ilustrazioak eta eskultura birziklatuak egiten ditu. Sormenprozesu

biziaren bitartez eta materiaz, bolumenez eta kolorez betetako pintura ia eskultorikoa baliatuta, bere emozioak eta sentimenduak adierazten ditu, eta elkarrizketa bilatu. Zenbait proiektutan kolaboratu du Euskal Herriko artearen artista adierazgarrienekin, eta hainbat liburutan parte hartu du askotariko azterlanekin. Bere obra proba-, entsegu- eta esperientzia-lan irmoarekin lotzen da, eta teknika mistoak baliatzen ditu adierazi nahi duena ondoen adierazteko.

Arlo profesionalean, 1998tik 2015era, bi marka hauek sortu zituen: "Mitxoleta", haurrentzako artisau-album eta-koadernoena, eta "Art-Panel" dekoratzeko mural artistiko handiena. Bada, bi marka horien zuzendari artistiko, sortzaile eta diseinatzailea izan zen, eta, horien originaltasunagatik eta kalitateagatik, sariak jaso zituen.

Foto-Ventas saria (Bartzelona, 2003).

Urteko Produktu Berritzailearen Saria (Varsovia, 2009).

Paraleloan, 1985az geroztik eta, batez ere, azken urteetan, hainbat erakusketa egin ditu, bai banakakoak bai kolektiboak. Bere muralak eta pinturak hainbat herrialdetan ikus daitezke; Korean, AEBn, Mexikon, Grezian, Turkian eta Frantzian, besteak beste.

Bere sormen-lan eta -ekoizpenaren ardatza bere barnerako espedizio berezia da: etengabe berrikusten ditu bere emozioak eta sentimenduak eta askotariko gaien bitartez erakusten ditu; horretarako, natura, giza irudia, bere ingurua eta bere oroitzapen eta ametsak baliatzen ditu.

"Nire kartoi eta oihalen bidez, bidean agertzen zaizkidan eta hausnartzeko bide ematen didaten isla iheskorren kontakizun bisualak erakusten ditut: keinu edo xehetasun soil eta iragankorren edertasunak hunkitu egiten nau eta horiek goratzera animatzen nau.

Nire eguneroko zeregin etiko eta estetikoak dira.

Bizitzaren iragankortasunean sakontzen dut eta gure existentzia definitzen duten inperfekzioak goraipatzen ditut. Orbainak esploratzen ditut; gure izatearen ikuspegi sakon eta argia osatu ahal izateko behar dugun argia leiho horietatik sartzen da, bada. Horietan, gure historiaren eta gizatasunaren edertasuna aurkitzen dugu. —

— Elena Arrese