Gabriela Kraviez artistaren (Buenos Aires, 1965) Vulnerabilidad-Resistencia obra erosi dio San Telmo Museoak Altxerri galeriari Irekiak Gallery Weekend ekimenaren testuinguruan, hiriko arte galerien alde egin ohi duen apostua berretsiz. Irekiak Gallery Weekend ekimena ospatzen denetik museoak urtero erosi du obra bat.

San Telmok erositako obra Altxerri galerian urriaren 7ra arte ikusgai dagoen Autoréparations erakusketaren parte da. Bertan, artistak aurkezten dituen obren abiapuntua da lengoaia irudikapen gisa eta idazketa inskripzio eta transkripzio keinu gisa.

Zeta-papera erabiltzen du hauskorra, arina, zeharargia eta iragazkorra delako, eta bere funtzioarengatik: objektu delikatuak biltzea eta babestea, hauskorra dena mintz babesle ere izatearen dikotomia horretan interesatuta. Paperezko eta kolazko geruza anizkunak zimurtu egiten dira, gainazala kartografia bihurtuz eta paperaren hauskortasuna erresistentzia-gainazal.

Irekiak Gallery Weekend

Irekiak Gallery Weekend Donostiako Arte Galeria Garaikideen Elkarteak (Altxerri, Arteko, Arteztu, Cibrián, Ekain eta Villa Magdalena galeriek osatua), Donostiako Udalak eta Tabakalerak sustatutako egitasmoa da. Arte galerietara sartzeko lau eguneko ate irekiak proposatzen dituzte eta bisita gidatuak eta ekintza osagarriak antolatzen dituzte arte garaikidearen erakusketa aldiari hasiera emateko. Ekimen honen bidez, Irekiakek arte garaikidea ezagutzera eman nahi du sorkuntza artistikoa sustatzeko eta galeriak hirira zabaldutako kultura-sortzaile gisa ikusarazteko.

Ekimenak hirugarren edizioa izan du aurten; irailaren 14tik 17ra ospatu zen.