Tabakalerak gaur inauguratuko du Situ-akzioak proiektuaren erakusketa berria María Jerez artistaren eskutik. Erakuketa, Herri bat behar da mendi bat altxatzeko deiturikoa, IPI Karmengo Ama eta Herrera Ikastetxea eskolekin elkarlanean egin da, baita sorkuntza prozesuarekin konprometitutako familia talde batekin ere.

Situ-akzioak jolaserako, zentzumenen aktibaziorako, ikasketarako eta esperimentazio artistikorako eremuak sortzea bultzatzen duen proiektua da, batez ere hiru urtetik gorako umeentzat pentsatua, baina edozein adinetako publikoari irekia. Oraingo honetan, erakusketak etengabeko eraldaketan dagoen paisaia batean barneratzera gonbidatzen gaitu, non ematen dugun urrats bakoitzak eta egiten dugun keinu bakoitzak, gure ingurua aldatzeko eta moldatzeko gaitasuna duen.

Herri bat behar da mendi bat altxatzeko erakusketak unibertso batean murgiltzen gaitu, eta bertan paisaia ez da bakarrik begiratzeko, parte hartzeko ere bada. Gora igo, mugitu, biratu, putz egin edo laztantzetik, soilik begiratzera, paisaia horrekiko interakzioak aukera ematen digu inguratzen gaituena ulertu eta harekin lotzeko modu berriak aztertzeko.

Erakusketak esploratzera eta irudimenera bultzatzen gaituzten askotariko elementuak aurkezten ditu: hazten diren mendiak, biraka dabilen eguzki erraldoi bat, lurpeko munduetara garamatzaten oihalak… María Jerezen proposamena ez da soilik erakusketa bat, familiek parte hartzeko eremu eta elkargune bat ere bada.

Jardueren egitaraua

Erakusketa gaur arratsaldean inauguratuko da, 18:00etan, eta bihartik abuztuaren 25era arte bisitatu ahal izango da bigarren erakusketa-aretoan, Tabakalerako lehen solairuan.

Astebururo eguerdiko 12:00etan dinamizatutako saioak eskainiko dira, larunbat nahiz igandetan. Parte hartzeko beharrezkoa da aldez aurretik tabakalera.eus webgunean izena ematea.

Gainera, maiatzetik uztailerako goizetan, eta publikoari irekita ez dagoen orduetan, eskoletako taldeei eta beste talde batzuei zuzendutako jarduerak egingo dira.

Maiatzaren 30ean, María Jerez artistaren "María va a la escuela" dokumentala proiektatuko da Tabakalerako zineman, eta ondoren solasaldia egongo da. Filman Belgikako V-tex eskolan umeek rol tradizionalei nola aurre egiten dieten ikus daiteke artistari nederlandera irakatsiz. Dokumentalak hartu-eman horretan sortutako hauskortasuna eta aurkikuntzak aztertzen ditu; elkarlana eta ezezagunarekiko harremana nabarmentzen dira bertan.

Ekainaren 1ean, larunbata, 17:00etan, María Jerezek "Blob" pieza performatiboa aurkeztuko du Tabakaleran. Lan honetan, Jerezek bi pertsonen arteko elkartzearen misterioa aztertzen du eta eremu bat sortzen du, non etengabe mugitzen ari den forma batek publikoaren zentzumenak desafiatzen dituen, adi egotera eta etengabeko aldaketei irekita egotera bultzatuz.

Biografia

Maria Jerez-ek (Madril, 1978) koreografia, zinema eta arte bisualak uztartzen ditu bere lanean. Lehen obretatik, aurka egiten die antzerkiko eta zinemagintzako arauei, eta azken lanetan ezagunaren eta ezezagunaren, organikoaren eta artifizialaren arteko harremana zalantzan jarriz, aukeradun eremuak irekitzea bilatzen du. Haren arteak gizakion ohiko logikari aurka egiten dio eta giza-jakinduriak beste ekosistema enigmatikoen aurrean duen hauskortasuna aztertzen du. Haren ekoizpen artistikoaz gain, proiektu pedagogikoetan, kontserbazioari lotutakoetan eta argitalpenetan kolaboratzen du.

Informazio praktikoa

• Apirilaren 25etik abuztuaren 25era.
• Erakusketa-aretoa 2 (1. solairua)
• Ordutegia: asteartetik igandera, 12:00-14:00 eta 16:00-20:00