Lehiaketaren lehen edizio honetan, Maider de la Fuente eta Lucía Pardos Ariasen "Replantearse para adaptarse" egitasmoa izan da irabazlea, eta 2.000 euroko saria jaso du. Hiru erakundeek osatutako epaimahaiaren iritziz, "egitasmo honetan proposamena –forma aldetik lasaia– eta ideien sakontasuna izan dira bereizgarriak. Ingurune guztia elementu bakarrarekin antolatzeko gaitasunak erakusten du heldutasun handia eta materialaren trataera egokia". Adeitasun formalaz haratago, "Replantearse para adaptarse" lana prozesu integral baten emaitza da; egurren erabilera maximizatzen du, hondakintzat jo daitezkeen zatiei beste bizitza bat eskainiz. Egitasmoan erabili diren fabrikazio digitalerako teknikak konbinatzeak agerian utzi dizkigu egurra erabiltzeko modu berritzaile berriak.

"Replantearse para adaptarse" ("birplanteatzea egokitzeko", euskaraz…) egitasmoa Tabakalera eraikineko bigarren solairuko atondo izango den horretan jarriko da –egun Medialabeko atari gisa erabiltzen den espazioan– eta 30 bat pertsona hartu ahal izango ditu harrerarako, atsedenerako eta ikasketarako leku honek, betiere sorkuntza garaikidea eta arte eta kulturaren hedapena helburu dituen zentro honen testuinguruarekin bat datozenak. Egitasmoa gauzatzeko Joel Banús, Oriol Galí, Alex Ahedo eta María Díazen laguntza jasoko dute sortzaileek.

Saritutako beste egitasmo batzuk

Irabazleaz gain, bi proposamenek eskuratu dute ex aequo accesita, 500 euroko sari banarekin. Lehena Raquel Irizar Ocinaren "Prisma Hexagonal" lana da; geometria bakarraren errepikapenaren bidez egitura konplexu bat sortzen du. Hainbat garaierako prisma hexagonalak errepikatuz lortzen den antolakuntza topografikoa bereziki aberatsa da, eta ingurunearen baldintzei egoki erantzuten die. Accesitarekin saritutako bigarren proposamena Iker Iturralde Minteguiren "Lo-Construyendo dos mundos" lana da; bitarteko mugatuak izan arren, indar formal handia du ezaugarri egitasmo honek. Sabaitik zintzilikatutako argi eta elementuekin lortutako espazioaren antolakuntza dotorea da; orain dagoen espazioa errespetatzen du, eta bereziki nabarmena da zintzilikatutako zirkuluen eta bertan dauden mahaien arteko erlazioa.

Era berean, epaimahaiak aipamen bereziak eskaini dizkie beste hiru egitasmori: Louis Fräntzki, Aaron Knaak, Mattea Müther eta Wanda Glöckner-en "All in One Plate" lanari, Alex Ahedo Tapia eta María Díaz Gonzálezen "Biltzen" egitasmoari eta Aitor Monje Lópezen "Contra Corrientes" proiektuari. Lehiaketaren maila igotzen lagundu duten proposamen horiek erakutsi duten berrikuntzak eta sorkuntzak nabarmendu ditu.

Baskegur, UPV/EHU eta Tabakalera arteko lankidetza

BASKEGUR Euskadiko Egurraren Elkartearen eta EHUko Arkitektura Goi Eskola Teknikoaren lankidetzarekin Tabakalerak antolatutako lehiaketak xede du ekipamendu publikoetarako esku-hartzeetan sorkuntza eta berrikuntza sustatzea, eta enfasi berezia ematen zaio PEFC jasangarritasun-ziurtagiria duen hurbileko egurra erabiltzeari.

Tabakalera eta BASKEGUR arteko aliantza lehena da egurraren balioa azpimarratzera bideratutako ekimen multzo batean; horietan egurra produktu jasangarritzat jotzen da, eta paper funtsezkoa du etorkizuneko diseinuan eta eraikuntzan. Lankidetza hori ez da soilik sorkuntzaren eta berrikuntzaren promozioan aurrerapauso bat, baita elkarrekin hartutako konpromiso bat ere, tokiko garapena eta ekonomia zirkularra sustatzen duten praktika jasangarriekin. Basogintza-kudeaketa jasangarri batetik datozen materialek ziurtatzen dute klima-aldaketa arintzea, deforestazioaren aurkako borrokan laguntzea eta nekazaritza-guneen bizi-kalitatea hobetzea nahiz despopulazioa prebenitzea.