Euskal Herriko Arte Garaikidearen Museoak, Artium Museoak, Alex Reynolds (Bilbo, 1978) artista eta zinemagilearen bideo-lan bat gehitu du Bilduma, ikusgai programara, museoko ondare-funtseko piezak txandaka eraikineko toki desberdinetan erakusgai jartzean duena. Palais (2020) lanean ―Bilduma Partekatua programari esker sartu da lana Museoaren biduman―, Alex Reynoldsek Bruselako Justizia Jauregian barrena oinez egin dituen ibilaldi batzuk dokumentatzen ditu, lehen pertsonan. Bideorekin batera, Palais, del pie al ojo a la mano, 10'37" (2022) diptikoa jarri da ikusgai, jauregi barruan grabatutako hartualdietako baten transkripzioa, arkatzez marraztua paper gainean.

Palais (2020), Eusko Jaurlaritzak sustatutako Bilduma Partekatua programaren baitan erositako lanean, Alex Reynoldsek (Bilbo, 1978) XIX. mendeko eraikin bat zeharkatzen du, Bruselako Justizia Jauregia, Leopoldo II.aren erregealdian 1883an inauguratua. Bere garaiko arkitektura-proiekturik erraldoiena izan zen Europan. 26.000 m²-ko kupula Bruselako hiri-paisaia zabalean gailentzen da. Estatuko boterearen, ordenaren eta legearen sinboloa da; eta erakundeen burokraziaren, pisuaren eta kontrolarena ere bai. Eraiki zutenean, auzo oso bat eraitsi zuten, Marolles izenekoa, eta milaka pertsonak alde egin behar izan zuen bertatik etxea utzita.

Reynolds gorputz erraldoi horretan barneratzen da, bere kamerari galdera bat balitz bezala helduta, bere korridore, igogailu eta bulegoetan barneratzeko, han sortzen diren soinuak erregistratuz: ur-tantak, oihartzunak, arnasa, bere oinen arrastaka. Jauregiaren handitasunean, espazio objektibo izateari utzi eta organismo bizi bihurtzen da, usaintzen duena, pitzatzen dena, eta egilea digeritu, eta ikusten duena.

Reynoldsek sartu-irten klandestino hori gorputz-esperientzia bihurtzen du, hitzik gabeko elkarrizketa gorputzaren eta zeharkatzean aktibatzen denaren artean. Espazioan zehar, eskala aldatuz doa. Horrela, arkitekturak berak izaki ñimiño bihurtzen du artista noizbehinka, eta, beste batzuetan, sabaia ukitu arte hazten du. Egileak proiektuaren hasieran kokatzen duen 2017ko testu performatibo batean, honako joera hau jasotzen da: "... ñimiñoa naiz", "... baldarra naiz", "... oso altua naiz". Eraikina eta artista erlazionatuta daude elkarren arteko urratze, arreta eta susmo prozesu batean.Palais keinu poetikoa eta aldi berean keinu politikoa da: artistak pitzadura bat sartu du botere-espazio horretan, entzuten, behatzen duen gorputzarena, erakusten duen opakutasuna argitzera ausartzen dena.

Bideoarekin batera, Palais, del pie al ojo a la mano, 10'37" (2022) diptikoa aurkezten dugu museoko Z Aretoaren sarreran: paperean egindako arkatzezko bi marrazki dira, Bruselako Justizia Jauregian grabatutako hartualdi bakoitzaren transkripzio sorta baten parte direnak. Artistak eraikinean barrena oinez egindako ibilbideak eskura pasatzen dira, eta eskutik paperera, irudien bisualizazioa ―hots, begia― tarteko. Seriea diptikoetan antolatuta dago, eta diptiko bakoitza sekuentzia beraren bi berrikuspen dira, sekuentzia berarenak izan arren marrazki desberdin bana sortzen dutenak. Palais-en, beraz, ezinezkoa da ibilbide bera bi aldiz egitea.

Alex Reynolds (Bilbo, 1978) artista eta zinemagilearen lana gure harreman- eta afektu-moduen etengabeko esplorazioa da, bereziki hizkuntza zinematografikoaren bidez adierazten direnean. Besteak beste, Guggenheim Bilbao Museoan, Caixaforum Bartzelonan edo Tabakaleran egin ditu erakusketak. Haren filmak BFI London Film Festival, FIDMarseille edo Documenta Madrid jaialdietan proiektatu dira. Ganteko KASKeko irakasle gonbidatua da.

Museoak berriki erosi dituen bi pieza horiek Z aretoan egongo dira ikusgai gaurtik 2026ko urtarrilaren 4ra arte, Bilduma, ikusgai programaren barruan. Bildumako obra esanguratsu batzuk aldian behin tokiz aldatzea eta toki desberdinetan erakusgai jartzea da programa honen helburua.