Yunping Li eta Martín Del Busto hautatu dituzte artista emergenteentzat Solomon R. Guggenheim Museumen egiten den Basque Artist Program izeneko egonaldi-programaren hurrengo ediziorako. Datorren udazkenean, bi artistek aukera izango dute beren ibilbide profesionalean aurrera egin, New Yorkeko eszena artistikoa gertutik bizi eta hainbat komisario, artista eta arteari lotutako erakunde ezagutzeko, New Yorkeko Guggenheim Museoko profesionalen eskutik.

Ekimena arrakasta handiz gauzatu da orain arteko bederatzi edizioetan —2015 eta 2025 bitartean, guztira 22 artistaren partaidetzarekin—, eta Guggenheim Bilbao Museoak 2014ko abenduan Solomon R. Guggenheim Foundationekin sinatutako Kudeaketa Akordioaren berritzearen parte da. Akordioak bi erakundeen arteko lankidetzan sakontzen du proiektu berrien bitartez, eta horien artean nabarmentzekoak dira bai artista emergenteei zuzendutako programa hau, bai EAEko graduatuei zuzendutako New Yorkerako beken programa, Museoak urtero deitua.

Yunping Li (Hubei, Txina, 1998)

Argazkilaritza eta performancea lantzen dituen artista bisuala da, bi diziplina horien arteko elkargunea ikertzen duena. Bere lanaren oinarria queer eta BIPOC komunitateen autoerrepresentazioa da, irudigintzaren bidez gauzatua, eta identitatearen eraikuntza, autoezagutza, aldaketa, denboraren joana, desira, sexualitatea eta deserrotzea bezalako gaiak jorratzen ditu. Bere trebakuntza borobiltzeko, Argazkigintzan espezializatutako Arte Plastikoetako eta Diseinuko Goi Mailako Gradua egin du ArteDiez eskolan, eta LAVMáster LAVen, biak Madrilen.

Martín Del Busto (Bilbo, 1999)

Nahiz eta argazkilaritza duen abiapuntu, Del Bustok euskarri fisikoak garatzen ditu iruditan hartzen dituen ehundurak goraipatzeko, sendoenetatik hasi eta iragankorrenetaraino. Dualtasun hori izan da beti bere lanaren bereizgarri: jaioterri duen Bilboren historian eta geografian ere hain nabarmena den dualtasuna, alegia. Inguruneaz baliatzen da introspekzio-lana egiteko. Hala, ustez protagonista den paisaia hartzaile soil bihurtzen du. Fine Art Photography + Creative Computing gradua eta masterra egin ditu Camberwell–University of the Arts Londonen, eta Bauhaus 100 (Dessau, Alemania) programan parte hartu du.