Tabakalera Kultura Garaikidearen Nazioarteko Zentroak, sorkuntzan laguntzeko zentro gisa, eta Kursaal Kongresu Jauregiak, berrikuntza eta zabalkunde kulturalaren alde egin duen apustuaren barruan, indarrak batu dituzte berriz ere proposamen artistiko berri bat garatzeko. Proposamen horretan, Rafael Moneo arkitektoaren fatxada ikonikoa sormen-mihise bihurtuko da berriz ere.

Lankidetzaren hirugarren urte honetan, Gradients obra aurkeztuko da, Playmodes kolektiboak sormen-kodearen, algoritmoen eta prozesu sortzaileen bidez sortua. Obraren komisarioa Irma Vilà i ÀƒÂ'dena da, kultura-arloko kuradorea eta ikertzailea, arteari, zientziari, teknologiari eta gizarteari lotutako proiektuetan ibilbide luzea egin duena. Pieza ikus-entzunezko site-specific obra bat da, eta Kursaal Kongresu Jauregiko fatxadarako ex profeso sortua. Irailaren 14tik, osteguna, irailaren 17ra, igandea, ikusi ahal izango da, 20:30etik 22:00etara.

Kursaaleko eraikinaren mugen eta bolumetriaren pertzepzio-metamorfosi bat bilatu nahian, Gradients obrak XXI. mendeko amarru bat sortu du: ikus-entzunezko elkarrizketa minimalista eta funtsezko bat, Rafael Moneoren lanaren soiltasun materiala, kromatikoa eta geometrikoa are neurri handiagoan nabarmentzen duena. Arte digitaleko proposamen horrekin, azal bisual berri bat sortu da, arkitekturarekin elkarrizketa intimo bat duena eta arkitekturari dimentsio poetikoa ematen diona. Playmodes kolektiboak adierazi duenez, "edukiontzi estatiko soil gisa betetzen duen zereginaz gain, Kursaaleko fatxada digitala sinbiosian dago jatorrizko proiektuarekin, eta arkitekturaren ageriko presentzia eta argiaren bidezko eraldaketa berresten ditu".

Azpimarratu beharra dago Gradients obra Irekiak Gallery Weekend ekimenaren hirugarren edizioko programazioaren barruan dagoela. Ekimen horretan, arte garaikidea hiriko protagonista izango da lau egunetan.

Gradients obra Medialab Tabakaleran garatutako eta Kursaaleko fatxadan proiektatutako bosgarren instalazioa da. Lehena Crimson Waves izan zen, Jaime de los Ríos artista donostiarrarena, eta 2021. urtean proiektatu zen, Irekiak ekimenaren lehen edizioaren esparruan. Bigarrena Denbora Latente izan zen, Karlos G. Liberalek eta Biko2 esku-hartze estudioak sortua. Kursaaleko gabonetako argiztapenaren elementu nagusia izan zen urte horretan bertan. 2022. urtean, Alba G. Corral artistak bi instalazio garatu zituen: Entremaliat, Irekiak ekimenaren bigarren edizioan, eta Estel, gabonetako argiztapenerako.

Playmodes

Playmodes artisau digitalen tailer txiki bat da. Ingeniari, musikari eta artista grafikoez osatutako taldea da, eta euskarri ez-konbentzionaletarako ikus-entzunezko piezak sortzen ditu. Haren proiektu guztiak bertan landutako teknologiekin garatzen dira (argi eta soinuzko murgiltze-instalazioak, eskultura-gailuak, aparatu zinetikoak, eszenografiak eta musika bisualeko unibertso abstraktu bat miatzen duten ikus-entzunezko kontzertuak).

Azken urteetan, Playmodes kolektiboak mundu osoan garatu ditu proiektuak, hala nola New Yorken, Pragan, Madrilen, SÀƒÂ£o Paulon, Houstonen, Genevan, Berlinen, Erroman eta Londresen. Halaber, musika elektronikoko ekitaldietarako proiektuak (hala nola Sónar Bartzelonan eta DGTL Amsterdamen) eta arte-erakundeetarako proiektuak (hala nola ZKM-Karlsruhe eta Ars Electronica Linzen) garatu ditu. Gainera, nazioarteko sariak jaso ditu hedabide berrien artearen esparruan.

Irma Vilà i ÀƒÂ'dena

Irma Vilà i ÀƒÂ'dena kultura-arloko komisarioa, ikertzailea eta produktorea da, eta hedabide berrien artean espezializatuta dago. Irma Vilàk zientzian eta ingeniaritzan ditu sustraiak, baina sorkuntza-praxiari eta kultura-arloko ikerketari lotuta bizi da. Arteari, zientziari eta kulturari lotutako nazioarteko ikerketa-proiektu hibridoak zuzentzen ditu eta haietan parte hartzen du. Hainbat kolektibo eta erakunderekiko lankidetzaren bidez parte hartzen du sormen-sarean. Haien artean, Luthiers Drapaires, Telenoika, CCCB, ArtFutura jaialdia edo Arts Santa MÀƒÂ²nica aipa daitezke. ISEA2022 Barcelona sinposioko zuzendariordea eta batzorde artistikoko kidea; komisarioa eta aholkularia Cosmocaixaren arte-, zientzia-, teknologia- eta gizarte-programan (NEO), Bartzelonako Zientziaren I. eta II. Bienaletako Arte eta Zientzia Programan (2019an eta 2021ean) eta Bartzelonako Ars Electronica Garden-en (2020an eta 2021ean). Universitat Oberta de Catalunya (UOC) izenekoan, Arteko, Multimediako eta Diseinu eta Sorkuntza Digitaleko graduetako irakaslea da, eta Mosaic aldizkariko zuzendarietako bat.