Pedro Sancristoval Murua kulturgile eta euskaltzain urgazlea zendu da, 90 urterekin. Euskal kulturgintzaren alde eginiko urratsengatik zen ezaguna usurbildarra, batik bat; hainbat proiektu hauspotu zituen urteetan. Besteak beste, Artium museoaren eta Gasteizko Jazz jaialdiaren sustatzaile izan da.

Politikagintzan ere aritu zen Sancristoval: Arabako Foru Aldundiko Kultura diputatua izan zen, agintaldi batez, 1999tik 2003ra, PPko Ramon Rabaneraren gobernuan, baina independente gisa. Hain zuzen, ikusmira piztu zuen haren hitzemateak: euskaraz egin zuen karguaren zina. Noblezia tituluak ere bazituen: Riscoko 3. markesa zen, eta Islako kondea (1979. urtean eman zioten izendapena).

Euskaltzaindiak eman du heriotzaren berri. Izan ere, Sancristoval estuki zen akademiari lotua, 1979tik. Euskaltzain urgazle izendatu zuten orduan, eta, gainera, Euskaltzaindiaren Ekonomia Batzordean aritu zen 1987tik 1989ra.