Euskal Herriko Arte Garaikidearen MuseoaK, Artium MuseoaK, Asier Medizabalen recto verso: An Anthology of Works and Writings (recto verso: obren eta idatzien antologia bat) argitalpenaren aurkezpena hartuko du datorren asteartean, martxoaren 24an, 18:30ean. Artistaren azken bi hamarkadetako ekoizpena –obrak eta idatziak– biltzen du liburuak, lau ataletan antolatuta: elkarrizketa luze bat, kolaboratzaileen galderak, proiektu hautatuen dokumentazioa eta artistak 2008az geroztik argitaratutako liburuxken faksimileen bilduma. Aurkezpena dela-eta, Artium Museoak solasaldia antolatu du Mendizabalen eta Olatz Otalora artistaren artean; hain zuzen ere, Otalora izan da argitalpenean parte hartu duten artista eta kolaboratzaileetako bat. Sarrera librea eta doakoa izango da, baina tokia mugatua da.

Asier Mendizabal artista (Ordizia, 1973) Bilbo eta Stockholm artean bizi da, eta bi hiri horietan lan egiten du. Hainbat hezkuntza-proiektutan parte hartzen du, eta eskulturako irakaslea da, gaur egun, Stockholmeko Artearen Errege Institutuan (KKH). Aspalditik izan du interesa XX. mendean euskal kulturaren berreraikuntzak abstrakzioaren hizkuntza bere egin zuen moduari buruz –zehazki, hizkuntza hura herri-ohituretara eta ohituretara moldatzeko moduari buruz– eta interes horixe abiapuntu hartuta garatu du bere lana. Ohiko gaiak ditu izaera kolektiboaren irudikapena, identitatearen eraikuntza eta teknikak fenomeno horietan duen zeresana, eta ideologiaren kritika gisa deskribatu izan da haren obra. Haren praktikak aurrez aurre jartzen ditu historiaren narratiba konbentzionalak, artxiboko objektuak edo objektu etnografikoak nahiz adierazpen politiko eta azpikulturalak, haien guztien baldintza teknikoak eta materialak aintzat hartuta. Bere jardunean, ohiko baliabidea du idazketa, eskulturarekin loturik betiere. Mendizabal JAI Jarduera Artistikoen Institutuaren proiektu pedagogikoaren parte izan da 2020an ekimena abian jarri zenetik, ikasketa-batzordeko kide gisa, baita haren tutore ere, 2023ko ediziora arte.

Bi hamarkadetan sortutako obren eta idatzien bilduma

recto verso: An Anthology of Works and Writings artistak azken bi hamarkadetan sortutako obren eta idatzien bilduma da, eta txandakako lau erregistro bereizik osaturiko hurrenkera modura egituratuta dago: elkarrizketa luze bat, kolaboratzaileen galderak, proiektu hautatuei buruzko dokumentazioa eta egileak 2008az geroztik argitaratutako liburuxken faksimileen bilduma. Argitalpenaren hitzaurrean bertan esaten denez, "atal errepikari horien hurrenkeraren xedea da kolokan jartzea bilduma baten narratibak iradokitzen duen aurrerabide lineala, artistaren praktikaren "biografia" metagarri baten modura erakusten diren erabaki, ideia, erreferentzia eta obren itxurazko kate kausala. Nolanahi ere, liburu koadernatua denez, obrak edonoiz, edonon edo edonola sortuak izanik ere haien artean erlazio gurutzatu bat badela iradoki arren, iradokizun hori gelditzen da obren signaturen bizkar josiak eta liburuaren atal bakoitza osatzen duten orrialde koadernatuen karpetek finkatutako ordenaren mende".

Liburua Paraguay Press argitaletxe frantsesak argitaratu du, eta Filiep Tacq (Kortrijk, Belgika, 1959) izan da diseinuaren egilea. Artistaren lanez gainera, Kim West norvegiar kritikari eta ikertzailearen saiakera bat dakar liburuak, eta Artium Museoaren zuzendari Beatriz Herráezen formatu luzeko elkarrizketa bat, baita Mendizabalen hurbileko artisten eta kolaboratzaileen galderak ere, honako hauenak, besteak beste: Lisa Tan (Syracusse, AEB, 1973), Jon Mikel Euba (Amorebieta-Etxano, 1967), Antonio Menchen (Toledo, 1983), Johanna Gustafsson Fürst (Stockholm, 1973), Itziar Okariz (Donostia, 1969), Koenraad Dedobbeleer (Halle, Belgika, 1975) eta Olatz Otalora (Algorta, 1990). Otalorak, hain zuzen, Asier Mendizabalekin solasean jardungo du Artium Museoan datorren asteartean, martxoaren 24an, egingo den aurkezpenean. 18:30ean izango da ekitaldia, eta sarrera librea izango da, lekuak bete arte.