Euskal Herriko Arte Garaikidearen Museoak, Artium Museoak eta Zas Kultur elkarteak Ane Berganzaren Salt Lake City Roads proiektua eta Jorge Moneo Quintanaren izenik gabekoa hautatu dituzte, bi erakundeek elkarrekin bultzatutako egoitza artistikoen esparruan garatzeko.

Deialdia martxoaren 18tik apirilaren 30era bitartean egon da zabalik, eta Arabako lurraldearekin lotura duten eta proiektu bat garatzeko interesa duten artista berriei zuzendua, lan-esparru partekatu baten eta laguntza profesional baten testuinguruan. Arabako Lurralde Historikoko arte-testuinguruari sorkuntza garaikidea ezagutarazteko espazio berri bat emateko eta hura babesteko borondateak bultzatu du ekimena. Esparru horretan, 20 proposamen jaso dira, hau da, iazkoaren (11 jaso ziren) halako bi.

Artium Museoaren eta Zas Kultur taldearen ordezkariek osatutako epaimahai batek baloratu ditu guztiak, eta kalitatea, planteamendu aniztasuna eta ikuspegien sendotasuna nabarmendu dituzte. Azken erabakia hartzeko, irizpide hauek hartu dira: kalitatea eta berrikuntza, proposamenaren bideragarritasuna eta ibilbide artistikoa.

Lehenengo egoitza abuztuaren 3tik irailaren 6ra bitartean izango da, eta bigarrena abuztuaren 31tik urriaren 4ra bitartean. Egonaldi horien emaitzak urrian aurkeztuko dira jendaurrean. Ekimen honek, bi kasuetan, Artium Museoko lan-espazio bat barne hartzen du eta, gainera, museoko eta Zas Kultur-eko lantaldeen laguntza. Azken horrek, era berean, bere espazioa jarriko du artisten eskura laguntza-ingurune gisa. Baliabideen konbinazio horren helburua sorkuntza-, gogoeta- eta elkarrizketa-prozesu aktiboa bultzatzea da.

Hautatutako artistak

Ane Berganzaren (Bilbo, 1999) praktika performancearen eta bideoaren esparruan kokatzen da. Ikus-entzunezkoan interesa du hizkuntza gisa —aldi berean erregistro, objektu eta gailu espazial gisa—, eta bere proposamenak ikusgai jartzen diren tokiaren arkitekturaz jabetzen dira, bistaratze-gailuak obraren osaeraren eta zentzuaren funtsezko parte eginez.

Egoitza-aldian garatzeko aurkeztutako proiektuak Garoñako Larrialdi Nuklearreko Planari (PEMBU) lotutako errepide-sarean eta Arabako lurzati-bideetan zehar zenbait ibilbide grabatzea eta ondoren proiektatzea planteatzen du. Proposamenak ez du lurraldearen irudikapen gisa jokatzen, baizik eta desplazamenduaren, irudiaren eta paisaiaren arteko integrazio-eragiketa gisa.

EHUn Arte Ederretan graduatua, Ikerketa eta Sorkuntza Masterra egin du Ane Berganzak Artean, eta bere prestakuntza hainbat programaren bidez zabaldu du: JAI – Praktika Artistikoen Institutua (Artium Museoa eta Tabakalera), Praktika Artistikorako Ikasketen Programa Esperimentala (PEEPA) (Matadero Madrid) eta Athens School of Fine Arts. Bere lana Montehermoson (Vitoria-Gasteiz), Tabakaleran (Donostia) edo Rekalde Aretoan (Bilbo) erakutsi da, besteak beste, eta YVML-High Desert (Kalifornia) bezalako nazioarteko egoitzetan parte hartu du.

Jorge Moneo Quintanak (Vitoria-Gasteiz, 1988), bestalde, praktika artistikoaren eta gailu zinematografikoaren arteko mugetan kokatzen du bere lana, mugimenduan dagoen irudiaren, artxiboaren, testuaren eta muntaketaren inguruko ikerketak artikulatuz. Bere praktikak zinema esperimentalaren, ez-fikzioaren, animazioaren eta ikus-entzunezko saiakeraren metodologiak hartzen ditu, eta irudiaren, memoriaren, lurraldearen eta eraikuntza narratiboaren arteko harremanak aztertzen ditu.

Egoitzarako aurkeztutako proposamenak aldez aurretik praktikan irekitako hainbat ikerketa-ildo garatzeko eta sakontzeko espazio bat planteatzen du, artxiboko irudiekin, argazkiekin, testu-materialekin, objektuekin eta bistaratzeko gailuekin egindako lanari lotuta. Euskarrien arteko bereganatze-, muntaketa- eta lekualdatze-prozesuen bidez, proiektuak dokumentuaren eta fikzioaren arteko tentsioarekin lotutako gaiak jorratzen ditu, bai eta irudi estatikotik eta material zinematografikotik irakurketa eta denborazkotasun berriak aktibatzeko aukerekin lotutakoak ere.

EHUn Arte Ederretan lizentziatua, Jorge Moneo Quintanak zinemari eta praktika artistiko garaikideei lotutako programa eta testuinguruetan parte hartu du, hala nola Bartzelonako Unibertsitate Autonomoko Sormenezko Dokumentalaren Teoria eta Praktika Masterrean, ENSA, IDFAcademy, Berlinale Talents edo JAI - Praktika Artistikoen Institutuan. Haren lana Tabakaleran, Montehermoso Kulturunean, Rekalde Aretoan, La Casa Encendidan edo DOX Centre for Contemporary Art-en espazioetan erakutsi da, baita IDFA, DOK Leipzig, Punto de Vista, Oberhausen, Filmadrid edo L 'Alternativa nazioarteko jaialdietan ere.