That Time, Tabakalerak eta Arte Ederren Bilboko Museoak elkarrekin egindako lehen erakusketa azken txanpan sartu da eta hiru obra berri eta garrantzitsu erakutsiko ditu: Goyaren erretratu bat eta Mari Puri Herreroren bi akuaforte. Orain arte ikusi ezin izan diren hiru artelan, erakusketa indartuko dutenak azken hilabetean, azaroaren 5ean itxi baino lehen.

Aragoiko margolariaren maisulanetako bat da Retrato de Martín Zapater, Francisco de Goyak 1797an margotutako mihise gaineko olio-pintura. Bertan, Goyak Martin Zapater (1747-1800) bere lagun handiaren erretratua egin zuen. Aragoiko merkatari aberatsa izan zen Zapater, Ilustrazioarekin lotutako arte eta kultura mugimenduen mezenasa. Goyak Zapater heldu baten irudia eskaintzen digu, berrogeita hamar urte ingurukoa, itxura osasungarri eta adoretsua duena. Irribarre txiki bat zirriborratzen du bere begirada garbi eta argia margolariarengan finkatzen duen bitartean.

Ricardo Barojaren, Rembrandten edo Goyaren lan grafikoa ezagutzeak Mari Puri Herrero artista bilbotarraren grabatuaren ikuspegi piktorikoan eragin zuzena izan zuen. Herrerok Gure Artea saria jaso zuen 2022. urtean bere ibilbide artistikoaren aitortza gisa. Reunion (1968) eta Son extraños (1975), bere akuaforteetariko bi, Tabakalerako erakusketa osatzen duten 107 piezei gehitu zaizkie.

Jarduera-programa zabala

Azken txanpan, Tabakalerak indartu egin du erakusketaren inguruko jarduera-programa, eta hainbat aukera proposatu ditu publikoak erakusketara hurbiltzeko aukera izan dezan.

Datorren urriaren 20 eta 21ean "Poner la mano en el tiempo" egingo da, irudien bidez denboraren egituraketari buruzko hausnarketa proposatzen duen mintegia. Bertan parte hartuko dute Andrea Soto Calderón filosofian doktoreak eta Michael Marder Ikerbasqueko ikertzaileak, erakusketako bi komisarioekin batera, Miriam Alzuri artearen historialari eta Arte Ederren Bilboko Museoko kontserbatzailearekin eta Oier Etxeberria Tabakalerako Programa Publikoen saileko arduradunarekin. Egitaraua ostiral arratsaldean hasiko da topaketa batekin. Bertan, Soto Calderonek eta Marderrek beren ikuspuntuak azalduko dituzte hitzaldi bikoitz formatuan. Larunbat goizean, lan-saio bat egingo dute aipatu gonbidatuen eta erakusketaren komisarioen parte-hartzearekin. Azken saio honetarako tabakalera.eus webgunean izena eman behar da.

Era berean, Tabakalerak bere "flash" bisiten programari eusten dio, erakusketara hurbilketa labur bat egin eta bisitatzeko behar den testuingurua eskaintzeko asmoz. Bisitaldiak asteartetik igandera euskaraz 12:30ean eta 18:00etan eskaintzen dira, eta gaztelaniaz 12:45ean eta 18:15ean.

Horiekin batera, hamabost egunean behin egiten diren bisita solasaldiak mantenduko dira, baita familientzako arte-lantegiak eta arte garaikidera hurbiltzeko Arte-makina ikastaroa ere. Ikastaro horretan, Susana Talayero eta Leire Aranberri artistak, Ane Lekuona komisarioa eta Juan Pablo Huercanos Oteiza Museoko zuzendariordea izango dira.

• That Time. Arte Ederren Bilboko Museoa-Tabakalera
• Ekainaren 23tik azaroaren 5era.
• Tabakalerako erakusketa-areto nagusia.
• Ordutegia: Asteartetik igandera: 12:00-14:00 eta 16:00-20:00.
• Astelehenetan itxita.