Inmersiones, artista berrien biltzarra, halako ezaugarriak biltzen dituen ekitaldi bakarra da Euskal Herrian, eta parte hartzeko epea zabaldu du. Hamazazpigarren edizioa du, eta topaketa honen helburu nagusia da artistei eta beren proposamenei ikusgaitasuna ematea, baita jakintza trukatzea ere.

Inmersionesen XVII. edizioa Feministaldiaren XIX. edizioarekin senidetuko da, honako lelo honen pean: "agur eta ciao". Hala, bi egitasmoen programetan, kaixo eta adio esatearekin lotutako guztia landuko da, izan ere, euskarazko agur hitzak eta italierazko ciaok bietarako balio dute, jasotzeko eta adio esateko

Premisa horretatik abiatuta, Inmersionesen aurtengo edizioak bidea emango die topatzearen ideiari, agurtzeko protokoloei, loturei, bai eta ideia horien inguruan mugitzen den guztiari ere.

Feministaldia kultura feministako jaialdi bat da; 2005ean jaio zen, Donostian. Beren planteamenduan, sinetsita daude arte garaikideari eta kulturari begirada transfeministatik heltzeak balio dezakeela kultur politikak eta mundua antolatzen duen menderakuntza- eta desberdinkeria-sistema zulatzeko.

2024ko edizioan, hasteko, prologo bat egingo dute azaroaren 20an; ondoren, jaialdia azaroaren 27tik 30era izango da, eta, azkenik, Inmersiones biltzarra abenduaren 14an. "agur eta ciao" leloa baliatuko da bi edizioetan.

Parte hartzeko modalitateak

Artistek urriaren erdialdetik azaroaren erdialdera bidal ditzakete beren proposamen artistikoak, eta parte hartzeko bi modalitate aurreikusten dira edizio honetan:

1/ Topaketa publikoa. Hitzaldi formatuko esku-hartzeak aurkez daitezke, loturaren eta horren deriben harira.

2/ Lagun bati esan. Enkontruak antolatzeko eta beste batzuekin topo egin nahi duten pertsonak biltzeko, izan elkarrizketa formatuan edo bestelako bilera-mota batean.

Epaimahaikideen ebazpena azaroaren 18an jakinaraziko da publikoki Inmersionesen komunikazio sozialeko kanalen bidez. Aukeratutako proposamenak abenduaren 14ko biltzarrean aurkeztuko dira, Vitoria-Gasteizko ZAS espazioan.

XVII. Inmersionesen oinarriak hemen daude irakurgai: inmersionesgasteiz.com

2024ko Inmersionesek, datorren astean, Educacciones ekintza antolatuko du; helburua: arte garaikidea ikasleei hurbilaraztea, artista edo kolektibo baten bidez. Kasu honetan, Yun Ping argazkilari, artista bisual eta performerrak sormen-proposamenak eta ekintzak partekatuko ditu Federico Baraibar BHI, Ekialdea BHI, Urkide eta Egibide hezkuntza-zentroetan. Lantegien ardatza Feministaldiaren eta Inmersionesen leloa izango da, eta, zehazki, orla-argazkilaritza landuko da, gure bizitzako hezkuntza-etapa bati agur esateko balio baitu.

Aurkeztu da, halaber, Inmersionesen iazko edizioaren katalogoa: Hacer fuego / Sua egin izan zen leloa, eta Ane Rodriguez aritu zen komisario-lanetan.