Esther Ferrer artista donostiarra Abiadura Handiko Trenaren (AHT) geltokia eraikitzearen ondorioz sortutako plaza berriari ongietorria egingo dion instalazioa amaitzen ari da egunotan. Obra gune horretarako sortu da bereziki, eta egileak dohaintzan emango du. Artistaren Zenbaki lehenen poema serieko pieza bat da eta Sophie Germain (1776-1831) matematikari frantziarra omentzen du. Zeramikazko zoru-instalazio bat da, kolore urdina eta berdea dituena (Ferrerren hitzetan, Donostia identifikatzen duten koloreak dira). Obra Tabakalerako bigarren solairurako sarbidean ipiniko dute, eta hiri-ingurune berriaren erreferentziazko elementu artistikoa izango da.

Tabakalerak eta Donostiako Udalak lagundu dute proiektua, eta obra hori plaza berrian kokatzeak duen balio sinbolikoa nabarmendu dute. Ferrerren atzera begirakoak inauguratu zuen Tabakalerako erakusketa-aretoa 2019an, eta zentroko erakusketarik bisitatuenetako bat izan zen. Orain, berriz, hiriak sorkuntza garaikidearekin duen konpromisoa indartzeko pieza iraunkor bat sortu du.

Aurreikusitakoaren arabera, plaza berriaren egokitzapena eta instalazioa datorren urtearen hasierarako egongo dira amaituta.

Artistaren biografia

Esther Ferrer (Donostia, 1937) funtsezko figura da arte garaikidean. ZAJ taldeko kidea izan zen 1967tik 1996an banatu zen arte, eta 70eko hamarkadaz geroztik ibilbide sendoa egin du instalazioak sortzen, argazkigintzan eta zenbaki lehenei lotutako lanetan. Espainiaren ordezkaria izan zen Veneziako Biurtekoan (1999), eta, besteak beste, Arte Plastikoen Sari Nazionala (2008), Gure Artea Saria (2012), Velázquez Saria (2014) eta Donostiako Urrezko Danborra (2022) jaso ditu.