Objektu tradizional bat birdiseinatzea proposatzen du San Telmo museoaren Hau diseinu lehiaketak. Sehaska izan da aurten aukeratutako objektua, eta Iciar Sanchez diseinatzaile hondarribiarraren (Gasteiz, 1991) Kabi proiektua izan da garailea. Sehaska habia baten modura irudikatu du, haurrentzat aterpea baita. Proiektuak museoan daude ikusgai, irailaren amaierara arte.

Kabi izena du zure sehaska gaurkotuak. Zergatik izen hori?

Produktuaren formagatik, aterpe bat gogorarazten zidalako. Eta haur batentzat habia bat delako aterpe bat. Gainera, gurasoek eraikitzen dute sehaska, txoriek beren kumeentzat eraikitzen dituzten bezala. Beraz, formagatik eta eraikitzeko moduagatik jarri nion izen hori.

Nondik hasi zinen berritzen, gero berreraikitzeko?

Lehiaketan eskatzen zuten tradizioa eta garaikidetasuna uztartzeko. Pertsonen benetako beharrak aurkitzen saiatu nintzen. Nik egin nuena izan zen garaikidetasunean pentsatu, baina erabiltzaileen ikuspuntutik. Kasu honetan, erabiltzaileak haurrak dira, baina gurasoak ere bai. Alde batetik, etxe moderno batekin bat egingo zuen objektu bat egin nahi nuen.

Eta, bestetik, poltsikoari ere begiratu diozu?

Bai. Sehaskak alokatzeko zerbitzu bat diseinatu nuen, familiei laguntzeko: haur bat jaiotzeak poza ematen duelako, baina kontu korrontean zulo bat ere sortzen du [barrez].

Sehaska familiaz familia pasatzea tradizioa izan da. Horri eutsi nahi izan diozu?

Lehiaketan, San Telmo museoan dagoen sehaska aipatuz, azaltzen zuten lehen baserrietan sehaska propioak egiten zituztela. Orain, ordea, jendea etxez aldatzen da, familia edo lagunak ez dituzte gertu... Zailagoa da gauzak oinordetzan jasotzea. Horrez gain, gauzek ez dute hainbeste irauten. Beraz, nik sortu nahi nuen objektu bat pertsona batetik bestera pasa zitekeena eta irauten duena. Niretzat, zerbait jasangarria baita irauten duena eta konpon daitekeena.

Erabiltzaileek zorroa eta lastaira erosi beharko dituzte, baina ez egitura.

Sehasken alokairu zerbitzua da proposatutakoa: behar duzunean, egitura alokatuko duzu, eta, ez duzunean behar, deitu eta bueltan eramango lukete. Apartekoa litzateke zerbitzua gizarte segurantzak eskaintzea. Lanpostu batzuk ere sortuko lirateke: bezero arreta, zorroak egitea... Dena bertan egina.

Diseinuari dagokionez, zertan eman diozu ukitu garaikidea?

Estetikan, minimalista delako. Hondartzako hamaka batean inspiratu naiz, hodizko egitura bat eginez, olana batekin. Beraz, ehuna ere egitura bezala erabiltzen du sehaskak. Begiz oso arina da, eta horrek ere ematen dio ukitu garaikidea. Hasieran, hodia industrialagoa zen, altzairuzkoa, baina, haur batentzako zenez, ez zen geratzen hain goxo.

Zer garrantzi du jasangarritasunak diseinuaren arloan?

Oso garrantzitsua da, eta kontu handiz ibili behar da. Produktu jasangarri bat diseinatu behar dugunean egin behar den lehen gauza da erabileran pentsatzea. Zer erabilera izan behar du? Laburra izango da, edo erabiltzaileak mantendu nahi izango du? Mantendu nahiko badu, iraupen luzeko produktu bat diseinatu behar dugu, eta emozioak sortu behar ditu. Beraz, kontuan hartu behar da iraunkortasuna eta tokiko materialak erabiltzea. Eta objektuak erabilera bakarra izango badu, zerbitzu izaera har dezan pentsatu behar dugu, kasu honetan bezala.

Zergatik erreparatu behar zaie emozioei?

Nire ustez, oso garrantzitsua da. Sekulako ilusioa egiten dizuten bota batzuk askoz ere hobeto zainduko dituzu beste batzuk baino. Beraz, benetan maiteminduko zaituen zerbait sortu behar da. Eta, gainera, beste marka batzuekin lehiatzen ari zara, zu bezain onak edo hobeak direnak. Hortaz, modu batera edo bestera, ilusioz erabil dezaten saiatu behar duzu.

Zergatik erabaki zenuen lehiaketan parte hartzea?

Begiz jota nuen lehiaketa, baina data pasatzen zitzaidan beti. Diseinatzaileok erronkak behar ditugu. Freelance gisa lanean hasi nintzen iaz, eta aukera ona iruditzen zitzaidan nire proiekturen bat ikusarazteko. San Telmo museoa erakusleiho bikaina da horretarako.

Erraza da diseinuaren arloan freelance gisa lan egitea?

Ezer ez da erraza. Eroso egon behar duzu ziurgabetasunean, beste edozein freelance edo autonomo bezala. Lan asko egin, asko mugitu eta dituzun kontaktuak erabili. Besteren kontura ere lan egin izan dut, eta hori ere zaila iruditzen zait.

Baduzu beste proiekturik esku artean?

Sancheskiko skateak ere diseinatzen ditut. Tecnun Nafarroako Unibertsitatearekin ere kolaboratzen dut. Eta etorkizuneko lankidetzei irekia nago.