2024ko Tabakalerako erakusketa-programak eskulturari erreparatuko dio, hainbat korronte eta joera arakatuz, bai euskal testuinguruan, bai nazioartean. Ikuspegi hori bat etorriko da Eduardo Chillida eta Nestor Basterretxea eskultoreen mendeurrenekin. Programazio zabal baten bidez, Tabakalerak arte eskultoriko garaikidearen aberastasuna ospatzeaz gain, arte-adierazpen hori balioesteko ikuspegi eta testuinguru berriak eskaini nahi ditu. Erakusketa-areto nagusiak hiru mostra hartuko ditu urtean zehar, gaur egungo arte eskultorikoaren alderdi paregabeak aztertuko dituztenak.

Larruak eta izurrak erakusketa, Laura Vallés Vílchez komisario duena, euskal eskultura garaikidean barneratuko da, artista belaunaldi berrien nazioarteko nagusitasuna nabarmenduz. Materikoa dena, espazioa, gorputza eta mugimendua arakatuz, obrak performancera eta koreografiara hurbiltzen dira. Erakusketak Sahatsa Jauregi, June Crespo, Kimia Kamvari eta Yael Davids artisten ekoizpen berriak eta Nora Aurrekoetxea, Iman Issa eta Lúcia Kochen lanak hartuko ditu barne. Ekoizpen berriko lanak, performance eta dantza garaikideko artistek eta kolektiboek aktibatuko dituzte, Tripak kolektiboak edo Beatriz Setienek, esaterako. Erakusketa otsailaren 24tik ekainaren 2ra egongo da zabalik.

Topalekuak erakusketak, Soledad Gutierrezek komisariatua eta ekainerako programatua, Eduardo Chillidak testuinguru garaikidean utzitako ondare artistikoa aztertuko du. Mostrak Chillidaren beraren eta Euskal Herriko eta nazioarteko artisten lanak barne hartuko ditu. Azken horietako batzuek ekoizpen berriak sortuko dituzte Chillida Lekurekin eta haren artxiboekin harreman estuan. Erakusketa Chillidak arteari buruz duen ikuspegi holistikoan oinarritzen da, naturarekin lotuta, eta intuizioaren alde egiten du lan-metodo gisa. Parte hartuko duten artisten artean Elena Aitzkoa, Josu Bilbao, Christian Salablanca, JUF Project, Laia Estruch, Marianna Simnett eta Sheroanawe Hakihiiwe daude.

Zentroaren areto nagusiaren erakusketa-programazioa Gabriel Chaile artista argentinarrari eskainitako bakarkako erakusketa batekin amaituko da, Veneziako Biurtekoaren azken edizioan izandako parte hartzearekin mundu mailako ospea bereganatu zuen artista. 1985ean San Miguel de Tucumanen jaioa, adobez egindako formatu handiko eskultura zirraragarriengatik da ezaguna Chaile, kolonaurreko zeramikaren forma eta erabilerak, etxekoak zein erritualak, gogora ekartzen dituztenak. Erakusketa hau Chailek Estatuan lehen aldiz egingo duen bakarkako lehen aurkezpena izango da eta Tabakalerarako propio sortutako ekoizpen berriak eskainiko ditu 2024ko urritik 2025eko otsailera bitartean.

Erakusketa-aretoa 2-ko programa

2024an, Tabakalerako bigarren erakusketa-aretoak bere urteroko programa eskainiko du, proposamen artistiko sorta eklektiko bat publikoari hainbat adierazpide eta ikuspegi sortzaile arakatzeko aukera eskainiko diona.

Urteko lehen erakusketaren helburua publiko zabala tokiko sortzaileen lanean murgiltzea izango da. You want it to be art and I want it to be magazine. Hilary Lloyd eta Many of Them-en arteko elkarrizketa (Zuk artea izatea nahi duzu eta nik aldizkaria izatea nahi dut). Hilary Lloyd bideoan, soinuan, eskulturan, pinturan eta instalazioetan esperientzia duen artista ingelesaren eta Many of Them aldizkariaren sortzaile diren Antonio Macarroren eta Pedro Canicobaren arteko elkarrizketa izango da. Urtarrilaren 27tik aurrera egongo da zabalik.

Apirilaren 26tik abuztuaren 25era arte, Situ-akzioak ekimenaren laugarren edizioa hartuko du areto berak, batez ere familiei eskainiko egitasmoa. María Jerez artista, koreografiaren, zinemaren eta ikusizko arteen artean mugitzen denak, hartuko du parte ekimenaren edizio honetan, bisitari gazteenei esperientzia bat eskainiz. Irailean, Donostia Zinemaldiarekin batera, ikus-entzunezkoen arloko sortzaileen lana erakutsiko du aretoak.

Erakusketa guztiek jarduera programa zabala izango dute: hitzaldiak, bisita-solasaldiak, familientzako arte-lantegiak eta Arte-makina, arte garaikidearen hurbilketa ikastaroa.

2024ko erakusketa-programa

• You want it to be art and I want it to be magazine. Hilary Lloyd eta Many of Them-en arteko elkarrizketa. | Datak: Urtarrilak 27-apirilak 7 | Lekua: Erakusketa-aretoa 2
• Larruak eta izurrak | Datak: Otsailak 24-ekainak 2 | Lekua: Erakusketa-areto nagusia
• Situ-akzioak | Datak: Apirilak 26-abuztuak 25 | Lekua: Erakusketa-aretoa 2
• Topalekuak | Datak: Ekainak 20-urriak 6 | Lekua: Erakusketa-areto nagusia
• Gabriel Chaile |Datak: urriak 25-2025eko otsailak 25 | Lekua: Erakusketa-areto nagusia