Arabako Foru Aldundiak itxi egingo du Gasteizko Amarika aretoa, bertan ekintzailetza eta berrikuntza zentro bat sortzeko. Diputazioak ohar bidez eman du erabakiaren berri. "Arabako Ekintzailetza eta Berrikuntza Zentroa errealitate bihurtzetik gero eta gertuago dago. Amarika aretoa da gune horretarako aukeratu den espazioa, eta bertan bilduko dira ekintzailetza zerbitzuak", azaldu du.

Amarika aretoaren itxiera "asko hausnartutako" erabakia izan da, Ana Del Val Kultura diputatuaren esanetan, eta dagoeneko kultur eragileei jakinarazi diete. Azken urteotan, nabarmen apaldu dira aretoan antolatutako erakusketak, eta diputatuaren ustez ez zaio behar besteko zukua atera espazio horri. Hargatik, aurrerantzean emango zaion erabilera berriarekin gune hori indartu eta berpiztu nahi du aldundiak: "Proiektu berria ekintzaileei zuzenduta egongo da, horietako asko gazteak. Zalantzarik gabe, espazioaren bilakaera naturala da, lurraldea aberastuko duena, baita erdigunea eta plaza bera ere". Hala, hemendik aurrera bertan "balio erantsi handiko zerbitzuak" eman nahi dizkiete enpresa berrikuntza prozesuetan aurrera egin nahi duten pertsonei eta taldeei.

Amarika aretoak hartu ohi dituen erakusketak Arabako foru sareko museoek, Artiumek eta Ignacio Aldecoa Kultur Etxeak hartuko dute beren gain, Del Valek azpimarratu duenez.

Argazkigintzarako erreferentziazko gunea

Sorkuntza garaikiderako eta argazkigintzarako erreferentziazko espazio bat izan da Amarika aretoa Gasteizen. 1994an ireki zituen ateak, eta denbora honetan guztian erakusketa eta kultur jarduera ugariren topagune izan da. Hasiera batean, argazkigintza garaikiderako erakusleiho izateko sortu zen, artista hasiberriek zein ezagunek euren lanak erakusteko era izan zezaten. Urteen joan-etorriarekin, argazkigintzak erdigunean izaten jarraitu du, baina bestelako diziplina garaikideei ere ateak zabaldu dizkiete. Azken urteotan, baina, oso erakusketa gutxi antolatu dituzte bertan, eta bisitari kopurua ere apala izan da —iaz 7.500 bisitari izan zituen, 2023.urtean 4.100 inguru eta 2022.urtean 4.400—.

Hainbat erakusketaren lekuko izan da aretoa. 2024ko azaroan, adibidez, Ellas, nosotras erakusketa hartu zuen: sortzaileek denboran zehar izan duten zeregina aldarrikatzen zuen proiektu kolektibo bat, emakumeek artean duten iraganari, orainari eta etorkizunari buruzko hausnarketa oinarri hartuta. Erakusketez gain, Amarika aretoa jaialdi eta ekitaldi esanguratsuen egoitza izan da. 2024ko urrian, esaterako, ArabaClick antolatu zuten, Euskal Herriko eta nazioarteko argazkilarien lanekin.