Tabakalerak 777.000 bisitari izan ditu 2023 urtearen amaieran. Kopuru bikaina da, 2022an baino 80 mila bisita gehiago. Hazkunde nabarmen horrek zentroak lehen mailako kultura-erreferente gisa duen posizioa sendotzen du. Erakusketek goranzko joera etenik gabea izan dute: 173.300 bisitari izan dituzte osotara, Medialab Tabakaleran bisitari gehien jaso duten urtea izan da ireki zenetik, eta programazioan parte hartu dutenen kopurua %70 hazi da. Horrek guztiak nabarmen lagundu du zentroak azken urte honetan izan duen balantze positiboan.

Bestalde, Tabakalerak bere posizioa hobetu du Fundación Contemporánea-k egindako El observatorio de la cultura-ren urteroko rankingean. 2023ko EAEko kultura-erakunde eta -jardueren zerrendan hirugarren postuan dago, Donostia Zinemaldiaren eta Guggenheim Museoaren atzetik. Tabakalerak posizionamenduan izan duen aurrerapen hori bereziki nabarmena da Estatu mailan, Kultura Garaikidearen Nazioarteko Zentroak 7 postu egin baitu gora, eta sailkapen orokorreko 33. postuan kokatu da.

Erakusketa-eskaintzari dagokionez, bereziki nabarmena da That Time mostraren arrakasta. Tabakaleraren eta Bilboko Arte Ederren Museoaren arteko lehen lankidetzak marka berria ezarri du, 41.100 bisitari erakarri ostean. Ekainaren 22an ireki zenetik, askotariko publikoen erantzun ona jaso zuen erakusketak eta Kultura Garaikidearen Nazioarteko Zentroaren historian gehien bisitatu den erakusketa bihurtu da, besteak beste, Francis Bacon, Francisco de Goya, Susana Solano, Mari Puri Herrero eta Ainara LeGardon artisten lanekin.

Priscila Fernandesen Zaldiek amesten dutena erakusketa, familia giroan gozatzeko proposamena, 24.800 bisitarik ikusi dute. Beste behin ere, asko izan dira 3 urtetik gorako haurrentzat bereziki sortutako instalazio interaktiboa gozatzera bertaratu direnak.

Isabel Hergueraren El sueño de la sultana erakusketak 16.500 pertsona erakarri zituen artista donostiarraren lehen animaziozko film luzearen sorkuntza prozesua ezagutzera.

Bestalde, Stromek, Donostia International Physics Centerrek Tabakalerarekin elkarlanean antolatutako erakusketak, 11.500 bisitariri hurbildu zien astronomia inklusiboa; Evil Eye: optikaren eta balistikaren historia paraleloa 17.000 pertsonek ikusi zuten; Ane Lekuona ikertzaileak komisariatutako Mar de Dios artistaren Batzuk erakusketara 7.200 pertsona bertararatu ziren. Azkenik, Máquinas de ingenio. Jakintzen bidegurutzean, urte amaieran inauguratutako artea, zientzia, teknologia eta gizarteari buruzko mostrak, 7.000 bisitari izan zituen abendura arte.

Kutxa Fundazioaren Artegunea aretoari dagokionez, bertan ikusgai izan diren argazkigintzarekin lotutako proiektuen erakusketek 48.200 bisitari lortu dituzte 2023an: Promesen testura (5.900), Lúa Ribeiraren Zeruratzea (12.200), Jan Grooverren Formen laborategia (19.800), eta Isabel Azkarateren atzera begirakoa ikusi dutenen kopuruak gora egiten jarraitzen du, 10.300 izan dira 2023ko amaierara arte.

Erakusketez gain, Tabakalerak oso zifra positiboarekin amaitu du urtea, jendearen parte-hartzeari dagokionez: programazioak 2022an baino % 30 parte-hartzaile gehiago erakartzea lortu du. Guztira, 408.500 pertsonak hartu dute parte zentroak joan zen urtean egindako kultur eskaintzan.

Bestalde, 2023a Medialab Tabakaleraren urterik onena izan da datuei dagokienez. Batez beste, hilean 20 mila pertsona baino gehiagok etorri dira bertara, eta inoizko bisitari-kopururik handiena lortu du. Guztira 247.200 mila bisitarik erabili dituzte Tabakalerako sorkuntza liburutegiak eta herritarren laborategiak eskaintzen dituzten zerbitzuak.

Zinema-aretoetan, oro har, audientziak behera egin duen arren, Tabakalerako zinemak publikoaren babesa mantendu du. Azken urtean, 18.000 ikuslek baino gehiagok aukeratu dituzte pantaila publiko partekatuan programatutako ia 200 filmak.

Azkenik, 2023an, ekitaldi pribatuak egiteko guneak eta zerbitzuak alokatzeagatiko diru-sarreren marka historikoa gainditu da berriro, pandemia amaitu zenetik etengabeko hazkunde-joera finkatuz.