Artium museoak 2025eko udazkeneko programazioaren berri eman du
Euskal Herriko Arte Garaikidearen Museoak, Artium Museoak, udazkeneko programa aurkeztu du, gorputza, ahotsa eta performatibitatea ardatz izango dituzten jarduera publikoen proposamen zabalarekin. Programak barne hartzen ditu hitzaldiak, lantegiak, proiekzioak, topaketa profesionalak eta performance ziklo bat, baita hezkuntza ekimenak eta familiei edo prestakuntza programei zuzendutakoak ere.
| 8 de Septiembre 2025
Iraileko azken asteburuan Trama programaren bigarren edizioa egingo da, mugimenduan dagoen irudiaren inguruko diziplinarteko programa. Oraingoan, ekofeminismoei eta ingurumen-justiziari eskainiko zaio, eta antropologia, zinema edo artea bezalako esparruetan erreferente diren adituek parte hartuko dute: Yayo Herrerok (Madril, 1965), Marc Badalek (Bartzelona, 1976), Mónica Nepotek (Guadalajara, Mexiko, 1970), Amaia Mirandak (Leioa, 1993), Lizar Begoñak (Sopela, 1996), Idoia Zabaletak (Gasteiz, 1970), Xiana do Teixeirok eta Teresa Castrok. Garbiñe Ortega eta Arantza Santesteban dira programaren komisarioak.
Urriko hirugarren asteburuan Lotura mekanikoak programaren hirugarren edizioa egingo da, museoan bizitzeko era batzuk eta besteak esploratzea helburu duen performance zikloa. Programan parte hartuko dute Clo Plasek (Xiana Arias (Fonsagrada, 1983) eta Berio Molina (Fonsagrada, 1979)), Estanis Comellak (Lleida, 1985), Patrick Hamiltonek (Lovaina, 1974), Leonor Lealek (Jerez de la Frontera, 1980), Ángela Millanok (Vitoria-Gasteiz, 1987) eta María Salgadok (Madril, 1984). Iñaki Martínez Antelok eta Catalina Lozanok komisariatuko dute performance ziklo hau.
Azaroan, Marwa Arsanios artista libanoarrari eskainitako bakarkako erakusketa inauguratuko da, Agustín Pérez Rubio komisario dela. Sortzaile honi Estatuan eskainitako lehen erakusketa da, eta Turingo Fondazione Sandretto Re Rebaudengo-rekin batera ekoitziko da.
Erakusketaren barruan, Uxue Alberdi (Elgoibar, 1984), Unai Iturriaga (Durango, 1974) eta Sustrai Colina (Urruña, 1982) consonnirekin elkarlanean antolatutako bertso-saio batean arituko dira.
Udazkenero bezala, museoak familiei zuzendutako hezkuntza-programa zabal bat ere abian jartzen du, publiko guztientzat diseinatutako jarduerak eskainiz.
Udako parentesiaren ondoren, familientzat pentsatutako hileroko amarauna programari ekingo diogu berriro. Lehen hitzordua irailaren 20an izango da, larunbata, Sergi Bukaren argi-itzalen ikuskizunarekin, Magialdia jaialdiarekin elkarlanean.
Urrian Bor-bor izeneko asteburuko lantegi irekiak itzuliko dira, arte garaikidearekin familiartean esperimentatzera gonbidatzen dutenak.
Era berean, ikasturtearen hasierarekin batera, Artium Museoak hainbat prestakuntza-etapari zuzendutako 2025-2026 ikasturterako hezkuntza-programetan izena emateko epea ireki du.
Urriko lehen astean, UNEDekin elkarlanean antolatutako unibertsitate-hedapeneko ikastaroaren hirugarren edizioa inauguratuko da. Arte garaikidearen lengoaiak eta praktika museologikoak ardatz dituen ikastaro hau sei saiotan egingo da asteazken goizetan, eta, museoko taldeez gain, artearen eta museologiaren arloko profesionalek ere parte hartuko dute, hala nola Haizea Barcenillak (Lezo, 1981), Isabel Mellének (Gasteiz, 1986) edo Leire Vergarak (Bilbo, 1973).
Azkenik, Euskadiko Filmategiko zikloen proiekzioak urrian itzuliko dira Klasikoak programarekin, eta aurten asteazken arratsaldeetan izango dira. Artium Museoa Euskadiko Filmategiaren zinema-zikloen egoitza ofiziala da 2021eko urriaz geroztik. Ziklo horietan beste espazio eta erakunde batzuek ere parte hartzen dute, hala nola, Tabakalerak eta Bilboko Arte Ederren Museoak, edota Donostiako Zinemaldiak eta Donostia International Physics Center-ek.
