Norman Rosenthal historialari britainiarrak, Arte Ederren Bilboko Museoan martxoaren 1era arte ikus daitekeen erakusketaren komisarioak, dioenez, artista handiek artearen historia zeharkatzen dute, beren ekoizpenean eragina duten aurreko figuren arrastoari jarraituz. Baselitzen genealogia artistikoa agerian uzteko asmoz, erakusketak museoaren bildumako bost obra nabarmen biltzen ditu orain, margolari alemanaren azken lanekin elkarrizketan.

Proposamena Rosenthalek Baselitzekin berarekin izandako lankidetza estu eta gogotsuan du abiapuntu. Baselitzek argi eta garbi aitortzen ditu artista garaikideen, Italiako eta Alemaniako Errenazimentuaren, Alemaniako Erromantizismoaren edo Afrikako arte primitibo deiturikoaren erreferentzia plastiko ugari, eta haiekin partekatzen du orientazio teknikoa eta tematikoa.

Hautatutako margolanen artean, Pietro del Donzello (edo bere anaia Polito) florentziarrari egotzitako Ama Birjina Haurrarekin eta santuak taula dago (c. 1490). Deboziozko eszena honetan, espazioa harrizko harmailadi baten bidez artikulatuta dago, Baselitzen pintura askotan errepikatzen den gora eta beherako elementu bat, eta, aldi berean, Marcel Duchampen Biluzia eskailera jaisten gogora dakarrena. Francisco de Zurbaránen Aurpegi Santua lanarekin (c. 1660), elkarrizketa buruaren edo garezurraren motibotik eta oihalen erabileratik abiatuta ezartzen da: Zurbaránen kasuan, begi-amarru piktoriko baten bidez; Baselitzenean, collagearen literaltasunaren bidez. Grekoak, berriz, San Frantzisko otoitzean Gurutziltzatuaren aurrean lanean (c. 1585), santuaren buruaren azterketa bikaina aurkezten du, burezurrean oihartzuna aurkitzen duena eta vanitas ilun baten protagonista dena. Lucas Cranach Zaharraren Lukrezia lanak (1534) agerian uzten du Baselitzek biluziaren tradizio alemanarekiko duen miresmena, Grünewalden eta Cranachen beraren eskutik datorrena. Azkenik, Francisco de Goyaren Burugabekeria hegalaria (1815-1824) grabatuaren izaki mitologikoa Baselitzen arranoen hegaldi subertsiboarekin konektatzen da.

Erakusketa irakurtzeko gako berriak ematen dituen topaketa harrigarri hau hurrengo asteetan bisitatu ahal izango da, itxi arte.