Ostendek eskarmentu handia du arte moderno eta garaikidearen alorrean: erakusketa garrantzitsuen komisario-lanak eta lantalde artistikoen kudeaketa-lanak uztartu ditu, baita nazioarteko lankidetzak sustatu ere, eta arreta berezia jartzen die publikoen parte-hartzeari eta edukien irisgarritasunari. Bere ibilbidean zehar, kultur erakunde entzutetsuetan aritu da, tartean Luxenburgoko Mudam – Musée d'Art Moderne Grand-Duc Jean museoan: 2024tik 2026ra birtartean Arte arloko zuzendaria izan da bertan. Denbora horretan, Ostende museoko programa artistikoaren buru izan da, eta bildumaren estrategiaz ere arduratu da. Horrez gain, komisario-lanetan aritu da, besteak beste, Igshaan Adams: Between Then and Now erakusketan eta uda ostean zabalduko duten Kaihō 解放: Japanese Women Artists after 1945 atzerabegirakoan.

Mudamen hasi aurretik, Guggenheim Bilbao Museoko Programa eta Eduki Artistikoen Zuzendari berria Londresko Barbican Art Galleryn aritu zen arte-arduradun, 2016tik 2024ra. Bertan, kritikaren harrera bikaina izan zuten erakusketak taxutu zituen mundu-mailako modernitatea, arte garaikidea, arkitektura, performancea eta historia kulturala uztartuaz, eta, haiei esker, izen ona lortu zuen nazioartean. Barbicanen komisario-lanak egin zituen hainbat erakusketa monografikotan, besteak beste Francis Alÿs, Carrie Mae Weems, Noguchi eta Michael Clark artistei eskainitakoetan, eta gaikako atzerabegirakoak ere tankeratu zituen, nola diren Into the Night: Cabarets and Clubs in Modern Art eta The Japanese House: Architecture and Life after 1945. 2016an Barbicanera iritsi aurretik, Palais de Tokyon hainbat erakusketa antolatu zituen komisario gisa, esaterako, Ugo Rondinone: I Love John Giorno eta Dioramas.

CIMAM erakundeko kidea da (Arte Modernoko Museo eta Bildumen Nazioarteko Batzordea), eta Yto Barrada artista 2026ko Veneziako Bienalerako Frantziako Pabilioiaren ordezkari izendatu zuen hautaketa-batzordeko kide izan zen. Horren aurretik, Dallas Contemporary museoko arte-arduradun laguntzaile izana zen, baita Ginebrako Arte eta Diseinu Unibertsitateko —HEAD— Artearen Teoria irakasle ere. Arte Garaikideko Komisariotza masterra (Royal College of Art, Londres), Artearen Historia masterra (Université Paris-Sorbonne) eta Ingeles Literatura masterra (Aix-Marseille Université) dauzka.

Guggenheim Bilbao Museoko Programa eta Eduki Artistikoen Zuzendari izateko izendapenaz honakoa esan du Ostendek: "Ohore itzela da Guggenheim Bilbao Museoarekin bat egin ahal izatea museoak eurak eta haien lanaren hartzaile diren komunitateak eraldaketa betean dauden honetan. Irrikaz nago erakundearen legatu aparta goratu ez ezik, partekatuko dugun etorkizunak ekarriko dizkigun aukerei eta ez-baiei tokia egingo dien programazio artistiko ausarta osatzen hasteko Museoko lantalde bikainarekin orpoz orpo. Elkarrekin jorratuko dugun ikuspegian, artistak eta haien ideiak oinarri hartuta helduko diegu hezkuntzari, ikerketari eta herritarren parte-hartzeari, eta nazioarteko ikusmirekin hartu-eman sakonean jarriko dugu euskal kulturaren aberastasun paregabea".