Tabakalera Kultura Garaikidearen Nazioarteko Zentroak eta Artiumek, Euskal Herriko Arte Garaikidearen Museoak, Jardun Artistikoentzako Institutuaren (JAI) bosgarren edizioan parte hartzeko deialdia zabaldu dute. Udako arte-eskola da, artistei zuzendua, eta praktika artistikoa da programaren muina, ikerketa, ekoizpena, pertzepzioa eta lan kritikoa sustatzen dituena. Hirugarren urtez jarraian, JAI-k Jorge Oteiza Fundazio Museoaren laguntza izango du.

Formakuntza-saioak ekainaren 26tik abuztuaren 30era bitartean izango dira: ekainaren 26tik uztailaren 5era, eta abuztuaren 26tik 30era bitartean, Artiumen, Euskal Herriko Arte Garaikidearen Museoan, eta uztailaren 8tik abuztuaren 23ra bitartean, Tabakalerako Artisten Gunean. Tabakaleran, parte-hartzaile bakoitzak estudio bat izango du formakuntza-aldian, eta programako tutoreen tutoretza indibidualizatua izango du. Abuztuan, parte-hartzaileek egonaldi labur bat egingo dute Altzuzan, Jorge Oteiza Fundazio Museoa dagoen herrian.

Jardun Artistikoentzako Institutua

JAI udako eskola gisa aurkezten da, truke eta gurutzaketa artistikoak garatzeko gune bat ezartzeko asmoarekin. Horretarako, jatorri oso desberdineko nazioarteko ahots profesionalak biltzen ditu programak, praktika artistikoak mundu garaikideari begiratzeko eta bere lengoaien erabilerari buruzko harreman kritikoa ezartzeko duen ahalmena identifikatzeko gai direnak.

Ibon Aranberrik (artista), Itziar Okarizek (artista), Alejandro Cesarcok (artista) eta Olatz Otalorak (artista) parte hartuko dute tutore gisa Institutuaren edizio berri honetan, eta irakasle-taldea gaur egun deialdia sustatzen duten erakundeen erakusketa-programetan eta programa publikoetan parte hartzen duten eragile profesionalek osatuko dute. Horrela, bosgarren edizioak irakasle talde hau izango du, besteak beste: Patricia Dauder, Jeremiah Day, Iman Issa eta Hilary Lloyd.

Horiekin batera, Institutuak ikasketa-batzorde bat izango du, honako hauek osatua: Clara Montero (Tabakalerako kultura-zuzendaria), Beatriz Herráez (Artium Museoko zuzendaria), Catalina Lozano (Artium Museoko komisario-burua) eta aipatutako lau tutoreak. Batzordeko kideek aukeratuko dituzte artisten eskola osatuko duten 16 parte-hartzaileak.

Deialdia

Artearen metodologietan sakontzeko interesa dutenei edo artistei zuzendua. Deialdia zabalik egongo da 2024ko otsailaren 27tik apirilaren 19ra. Parte hartzeko, hautagaiek izena eman beharko dute Tabakaleraren eta Artium Museoaren web orrietan aurkituko duten formulario baten bidez, eta beren Curriculum Vitaea, biografia, motibazio-gutun bat eta egindako lanen irudiak biltzen dituen dosier digital bat erantsi beharko dituzte.

Hautatutako pertsonek 400€ ordainduko dituzte JAIren ikasketa-programako prestakuntzarako matrikula gisa. Lau ikasketa-beka esleitu ahal izango ditu deialdi honen barruan. Beka horiekin matrikula ordaintzetik salbuetsiko da, eta 900 € emango dira ostatu-gastuetarako.