Sinatutako hitzarmenarekin, EHU-Guggenheim Bilbao Museoa Gela errealitate bihurtu da jada. Ekitaldian bi erakundeetako agintari gorenek hartu dute parte: Eva Ferreirak, Euskal Herriko Unibertsitateko Errektoreak, eta Juan Ignacio Vidartek, Guggenheim Bilbao Museoko Zuzendari Nagusiak. Halaber, bertan izan dira, Unibertsitatetik, Gorka Moreno, Bizkaiko Campuseko Errektoreordea; Itsaso Maguregi, Pintura Saileko Zuzendaria; eta Katrin Alberdi, Gelaren Zuzendaria; eta Museotik, Daniel Vega, Erakusketa eta Kontserbazio Zuzendari Teknikoa; Ainhoa Sanz, Kontserbazio eta Zaharberritze Koordinatzailea; Aitziber Velasco, Konserbatzailea eta zaharberritzailea; eta Sonia Núñez, Erregistroko Koordinatzailea.

Euskal unibertsitate publikoko errektorea pozik agertu da akordio hau sinatu delako: "Unibertsitatea eta Museoa elkarlanean ari ginen hainbat gaitan, eta orain beste lan-ildo bat ireki dugu: arte garaikidearen kontserbazioa eta zaharberritzea. Biak gara erakunde giltzarriak euskal kulturan; horregatik, asko dugu partekatzeko. Eta eskerrak ematen dizkiot, noski, Guggenheim Bilbao Museoari proiektu honetan jarri duen konfiantzagatik, Arte Ederren Fakultatean konfiantza izatea eta euskal unibertsitate publikoan konfiantza izatea ere badelako".

EHU-Guggenheim Bilbao Museoa Gela arte garaikidea kontserbatzera eta zaharberritzera bideratuko da batez ere, eta arlo horri lotutako gaurkotasuneko gaiei eta arazoei buruzko ikerketa- eta prestakuntza-jarduerak garatuko ditu. Gelan EHUko Arte Ederren Fakultateko ikertzaileek eta ikasleek parte hartuko dute, baita Guggenheim Bilbao Museoko profesionalek ere.

Proiektu honek aukera emango du jarduera akademikoak garatzeko (gradu amaierako lanak, master amaierako lanak eta doktorego tesiak), curriculumetik kanpoko praktikak egiteko, mintegiak eta ikastaroak antolatzeko, eta I+G+Bko lankidetzak bultzatzeko lantalde mistoen bidez. Guggenheim Bilbao Museoak ekarpen ekonomikoa egingo du urtero, eta ekarpen hori aldakorra izan daiteke, onartutako proiektu zehatzen arabera. Jarraipen-batzorde batek gainbegiratuko du proiektuaren garapena.