Hauek dira Museoko erakusketez gozatzera bertaratutako bisitarien kopuruaren datuak hilabeteka: ekainean 117.508 bisitari (iaz baino 6.921 gehiago), ireki zenetik ekainik onena; uztailean 165.853 bisitari (iaz baino 3.573 gehiago), bere ibilbideko arrakastatsuena, baita ere; eta abuztuan 194.954 bisitari (iaz baino 5.672 gutxiago).

Aurten ere, nazioarteko publikoa izan da nagusi (guztizkoaren % 78 Estatutik kanpokoa izan da, iaz baino % 2 gehiago), eta herrialde hauetatik etorritako bisitariak nabarmendu dira: Frantzia (guztizkoaren % 16), Britainia Handia (% 10), Alemania (% 9), Herbehereak (% 8), Italia (% 7) eta AEB (% 6). Estatu mailan, euskaldunen (guztizkoaren % 4), katalanen (% 4) eta madrildarren (% 3) kopurua gailendu da.

Publiko gehien bildu zen eguna abuztuaren 13a izan zen, asteazkena; 8.472 bisitari izan ziren egun osoan zehar.

Urteko kopuru metatuari dagokionez, 2025eko abuztuaren 31ra arte, Museoak 921.971 bisitari izan ditu; orain arteko kopururik handiena, aurtengo maiatza, ekaina eta uztaila arrakastatsuenak izan baitira Museoa ireki zenetik.

Uda honetan Museoak izan duen erakargarritasun-indarraren gakoen artean erakusketen eskaintza zabala aipatu behar da, askotarikoak eta anbiziotsuak izan baitira:Helen Frankenthaler: Araurik gabe margotzen, BBVA Fundazioak babestua (irailaren 28ra arte); in situ: Refik Anadol, erakusketaren partnertzat 1OF1 duena, partner teknologikotzat, berriz, Euskaltel, eta Google Cloud languntzaile gisa (urriaren 12ra arte); Barbara Kruger: Another day. Another night, Occident babesle duena (azaroaren 9ra arte); Guggenheim Bilbao Museoaren Bildumako artelanak, BBK-k babestua (iraunkorra), eta Vito Acconci/Sergio Prego: YOU, igande honetan, irailaren 7an, amaituko dena Film&Video aretoan.

Nabarmendu beharreko beste datu bat da Kutxabankek babestutako Art&Music zuzeneko musika-programak publikoaren aldetik izan duen arrakasta handia. 1.200 pertsona bertaratu dira Museoko terrazan egindako zortzi saioetara, eta agortu egin dira sarrerak.