Datorren abenduaren 20an, Eginzaleak!en hamahirugarren edizioa izango da Tabakaleran. Urtero egiten den topaketa honek teknologiaren, sormenaren eta ezagutza partekatuaren inguruko egitearen kultura eta praktika kolaboratiboak goratzen ditu. Urtean zehar Medialab Tabakaleran garatutako proiektuak azaltzeko erakusleiho gisa egonkortuda ekimena, eta DIY (egizu zuk zeuk) filosofia partekatzen duten kolektiboak, eragileak eta herritarrak gonbidatzen ditu.

Eginzaleak! 2025ek ibilbide bat proposatzen du autoedizioaren unibertsoan barrena, kultura autogestionatua markatu duten inprimaketa- eta erreprodukzio-teknikekin: risografiatik hasi eta fanzineak eta argitalpen alternatiboak sortzeraino. Gainera, edizio independentearen eta sorkuntza grafikoaren tokiko eta nazioarteko erreferenteak bilduko ditu, autoedizioaren panoramaren gaineko askotariko ikuspegiak erakusteko:

Asier Aguayok (Bilbo) —UPV/EHUn doktoregaia eta sortzailea S0K0RR0 ezizenez— grafikagintza politikoari buruzko bere ikerlana eta eskuzko tipografian duen esperientzia joria partekatuko ditu. El Lirón Gris proiektuagatik ezaguna den Elisabeth Pérez Fernández (Barakaldo) ilustratzaile eta Irudikako nazioarteko programen koordinatzaile eta zuzendariak hurbilketa sortzaile bat proposatuko du grabatuaren teknikara. Colorama (Berlin) proiektu-guneak, Johanna Maierskik sortuak, risografiako bere lan editoriala hurbilduko du, baita autoedizioa, esperimentazioa eta baliabideetarako sarbide zuzena ardatz dituen bere hezkuntza-programa ezaguna ere. Familia Plómez (Madril) kolektibo eta elkarte kulturalak inprenta tradizionalaren bere defentsa aktiboa erakutsiko du, tipografiako lanbidearen eta artisau-lanaren balioa bizirik mantenduta burutzen duena. L'Automàtica (Bartzelona) diseinatzaile grafiko, artista eta ilustratzaileen kolektiboak elkarte kultural eta esperimentazio grafikorako gune bihurtutako inprenta berreskuratzen egin duen lana partekatuko du. Artisau-serigrafiako Lanevera Ediciones tailerrak (Valentzia) ere parte hartuko du, irakaskuntzan, ikerketan eta egonaldi esperimentaletan ibilbide sendoa egina duenak. Gainera, Maialen Arocena (Irun) ilustratzaile eta muralgileak koadernaketa-ariketa errazak erakutsiko ditu, eta Maider Leturiaga (Zarautz) ilustratzaileak monotipiekin esperimentatzeko gonbitea egingo du, risografiako masterrak erabilita.

Horiekin guztiekin, eta egun osoan zehar, Tabakalerako hirugarren solairua laborategi grafiko bihurtuko da, sortzaile gonbidatuen teknika eta prozesuen erakustaldi aktibo batekin, non publikoak zuzenean parte hartu ahal izango duen edizio eta esperimentazio artistikoko ariketetan. Egunean zehar, hurbiltzen direnek hainbat teknika esploratu ahal izango dituzte, tartean risografia eta monotipia edo fanzineak eta koadernaketa-ariketa errazak eskuz egiteko moduak, eta faxa, tipo mugikorrak edo Letraseta bezalako tresnak erabili ahal izango dituzte.

Gainera, programazioan bi lantegi izango dira. Alde batetik, familiei (+5 urte) zuzendutako Bloke print lantegia, Ander Pérez de Arenazak (Donostia) emango duena. Animaziogile eta ilustratzaile honen lanak animazio-teknikak eta iruditeria propio bat uztartzen ditu, mitologiaren eta umorearen eraginak jasotzen dituena. Parte-hartzaileek arte grafikoen mundua ezagutuko dute hurbiletik eta, sormenaz baliatuta, eraikuntza-blokeak erabiliko dituzte estanpazioak egiteko.

Bestalde, Risogramak. Risografiako animazioa lantegia eskainiko da, helduei zuzendua eta Rapapawnek (Galizia) dinamizatua. Cynthia Alfonsok eta Óscar Rañak osatutako estudio hau nazioartean da ezaguna bere animazio esperimentalagatik eta iruditeria geometrikoagatik. Lantegi honetan, parte-hartzaileek inprimagailu risografikoa erabiltzen ikasiko dute, animazio txiki bat sortzeko. Ideia bat garatuko dute, irudiak prestatuko dituzte, eta konbinatu egingo dituzte loop animatu bat sortzeko, azkenean bideo bihurtuko dena.

Lantegietarako izen-ematea Tabakaleraren webgunean edo zentroaren informazio-gunean egin daiteke.

Programak topaketan parte hartu duten sortzaileen aurkezpen laburren saio batekin jarraituko du, eta DJ saio batekin amaituko da, Siwanabaren eskutik; musikarekin batera, risografiako animazio-lantegian sortutako bisualak proiektatuko dira.