Erakusketak Aragoiko maisuaren lanaren eta gaur egungo sentsibilitate artistikoaren arteko elkarrizketa sakona proposatzen du. María Bolaños da bere komisarioa, eta maiatzaren 16tik irailaren 27ra bisitatu ahal izango da.

1810 eta 1823 artean egina, serie honek — 80 estanpaz osatua — inbasio napoleonikoaren aurkako gerraren pasarte gordinenak jorratzen ditu. Bere irismena, hala ere, bere garaitik haratago doa: dagokion mendekoa izateari utzi gabe, Goyak esparru historikoa gainditzen du eta irudi horiek indarkeriaren eta giza sufrimenduaren mugarri unibertsal bihurtzen ditu. Haietan, gaur egungo hondamendiak indar asaldagarriz suma ditzakegu dagoeneko.

Modernitaterako bidean giltzarri, Goyak artea ulertzeko modu berri bat asmatu zuen, ikuspegi formaletik zein etikotik. Bere begirada erabat askeak artista lekuko, kontzientzia kritiko eta gizatasunaren mugen esploratzaile gisa kokatzen du. Erakusketak oinordetza hori jasotzen du eta XX. mendera begira jartzen du Guggenheim Bilbao Museoak erakusketarako mailegatutako Robert Motherwellen Iberia lanaren bitartez (1958).

Espainiara egindako bidaiak inspiratuta eta Pintura Beltzek erabat hunkituta, Motherwellek beltza nagusi den eremu abstraktu zabal bat sortu zuen Iberian, non pintura tragedia historikoaren oihartzun emozional bihurtzen den. Mihiseak elkarrizketa isila ezartzen du Goyarekin, Hondamenen intentsitate morala modu abstraktuan islatzen duen kontrapuntu izugarri baten moduan jokatuz.

Horrela, azalpen-ibilbideak esperientzia bat proposatzen du, indarkeria esplizitutik barne-kontenplaziora, narrazio figuratibotik abstrakziora, iskanbilatik isiltasunera igarotzen dena. Tintaren beltza eta olioaren beltza zeharkatzen dituen bidaia, indarkeriaren iraunkortasunaz, memoriaz eta arteak esanezinari forma emateko duen gaitasunaz hausnartzeko.

Erakusketan, artelanez gain, beste material batzuk ere aurkezten dira: Smithsonian American Art Museum-en argazkiak; Dedalus Fundation Archives-en eta Juan March Fundazioaren Artxiboaren ikus-entzunezkoak; 1958an Madrilgo Arte Modernoko Museoan aurkeztutako La nueva pintura americana erakusketaren katalogo bat; eta Encyclopédie-ren liburuki bat, San Telmo bildumarena.

Goya beltza, Motherwell beltza. Laurogei hondamendi eta amildegi bat erakusketak, azken batean, Goyaren legatuaren indarraldia eta arte modernoan izan zuen eragina berraztertzera gonbidatzen gaitu, indarkeriari, memoriari eta arteak krisi garaian duen paperari buruzko hausnarketarako gune bat proposatuz.