Tabakalera Kultura Garaikidearen Nazioarteko Zentroak eta Kursaal Kongresu Jauregiak indarrak batu dituzte proposamen artistiko berri bat eskaintzeko. Asteburu honetan, Rafael Moneo arkitektoak diseinatutako Kursaaleko fatxada ikonikoa mihise sortzaile bihurtuko da.

Elkarlanaren laugarren urte honetan, Lurrazala lana aurkeztuko da, arte digitala eta argazkigintza artistek eurek Kursaal inguruko kostaldean jasotako irudiekin uztartzen dituena. Sorkuntza bisual honek gure munduaren interkonexioari eta etengabeko eraldaketari buruz hausnartzera gonbidatzen du publikoa, eta Hotaru Visual Guerrilla talde donostiarrak sortu du, Irma Vilà i Òdena arte, zientzia, teknologia eta gizarteko proiektuetan ibilbide luzea egin duen komisario eta ikertzaileak lagunduta. Kursaal Kongresu Jauregiko fatxadarako propio sortutako "site-specific" obra bisuala, irailaren 12tik, osteguna, igandera, irailak 15, 20:30etatik 22:00etara izango da ikusgai.

Lurrazala terminoak esanahi desberdinak hartzen ditu testuinguruaren arabera, planetaren espazio ikusgarriari erreferentzia eginez: mendiak, haranak, ibaiak eta lakuak. Hotaru Visual Guerrilak sortutako lanak aztertzen du nola mundu naturaleko gure esperientziak sarritan zatikatuak eta osatugabeak diren, eta errealitatea hainbat lente eta bizipenen bidez berrinterpretatzea proposatzen du. Piezak paralelismo bat ezartzen du Rafael Moneoren ikuspegiarekin, zeinak Kursaaleko kuboak honela deskribatu zituen: "geografiari pleitesia ematen dioten hondartutako bi arroka erraldoi". Horrela, Lurrazalak Gipuzkoako kostaldeko irudiak txatalez osatutako mosaiko bihurtzen ditu, iraunkortzat jotzen dugunaren hauskortasuna azpimarratzen duen ikuspegi bisual berri bat eskainiz. Obraren zati bakoitzak erronka egiten dio publikoari irudiak bere buruan berreraikitzeko, edertasuna gure pertzepzioen konplexutasunean eta subjektibotasunean azaleratuz. Piezak naturaren aberastasun mugagabea eta harekin dugun harremana aztertzera gonbidatzen ditu ikusleak, esperientzia bisuala zein introspektiboa eskainiz.

Lurrazala Tabakalerak ekoiztutako eta Irekiak Gallery Weekend-en testuinguruan Kursaaleko fatxadan proiektatuko den seigarren obra da. Aurreko elkarlanetan Jaime de los Ríosen Crimson Waves, Karlos G. Liberalen Denbora Latente, Alba G. Corralen Entremaliat eta Estel lanak eta Playmodes kolektiboaren Gradients ikusizko sorkuntzak daude.

Artista kolektiboa eta Komisarioa

Hotaru Visual Guerrilla Donostian kokaturiko diseinu eta arte digitalean espezializatua den sormen estudio independente bat da, Ander Ugartemendiak eta Jone Vizcainok zuzenduta. Beraien lana estetika futurista eta ikuspegi esperimentalagatik nabarmentzen diren ikus-entzunezko esperientziak garatzean oinarritzen da. Estudioak zientzia, natura eta teknologiaren arteko konbergentzia ikertzen du, ikusleari errealitate alternatiboak irudikatzeko aukera ematen dioten elementu organiko eta digitalen arteko harmonia bilatuz. Euren proiektuak hainbat alditan sarituak izan dira eta nazioartean erakutsi dira Australia, Txina, Arabiar Emirerri Batuak, Estatu Batuak, Japonia, Alemania, Norvegia, Erresuma Batua eta Txekiar Errepublika, besteak beste.

Irma Vilà i Òdena bitarteko berrien artean espezializatutako komisario, ikertzaile eta kultur ekoizlea da. Zientzia eta ingeniaritzan oinarrituta eta praxi sortzailearekin lotura sakona izanik, Irmak artea, zientzia eta kultura barne hartzen dituzten nazioarteko proiektuetan parte hartu du. Irakaslea da Universitat Oberta de Catalunyan (UOC) eta Mosaic aldizkariko zuzendaritzako kidea. CCCB, ArtFutura jaialdia eta Arts Santa Mònica erakundeekin lan egin du, eta ISEA2022 Bartzelonako arte-batzordeko zuzendariorde eta kide izan da, besteak beste. Iaz Playmodes kolektiboaren Gradients lana komisariatu zuen Kursaaleko fatxadarako.