Tabakalerak, Kultura Garaikidearen Nazioarteko Zentroak, amaiera emango dio Topalekuak erakusketari asteburu honetan. Eduardo Chillidaren lana praktika artistiko garaikidetik irakurtzea proposatzen duen erakusketak ateak itxiko ditu azken lau hilabeteetan nazioarteko eta tokiko hainbat bisitari hartu ondoren.

Erakusketa itxiko duen programa urriaren 4an eta 5ean garatuko da, gogoeta egitera gonbidatzen duten hainbat ekitaldirekin, tartean poesia, performancea eta komisarioaren bisita gidatu oso berezia. Gainera, asteazkenean, urriak 2, azken bisita solasaldia egingo da erakusketara.

Programa

Sokasalto piezaren aktibazioa - Juf

Urriaren 4an, 19:00etan, Juf (Bea Ortega Botas eta Leto Ybarra) kolektiboko Leto Ybarrak Sokasalto bere pieza aktibatuko du, publikoa bere artxibo poetikora hurbiltzen duen performancea. Narrazioaren eta soinuaren baliabideak erabiltzen dituen eszenaratze baten bidez, blockbuster zinearen, irrati-antzerkiaren eta soinu-banden eraginak erakusten ditu ekintzak. Hala, ikuspegi horrek zabaldu egiten ditu olerkien inguruko errealitate politikoak eta sozialak, intrigazko eta emoziozko giroa sortuz. Poesiaren, artearen eta antzerkiaren arteko mugak aztertzen diharduen proiektu independentea da Juf, eta Madril eta New York artean lan egiten du.

Bisita gidatua Soledad Gutiérrez komisarioarekin

Urriaren 5ean, larunbata, 12:00etan, erakusketaren komisario Soledad Gutiérrezek bisita gidatua eskainiko du. Ibilbide horretan, Gutiérrezek erakusketaren kuradoretza gidatu duten funtsezko kontzeptuetan sakonduko du, eta obra bakoitza xehetasunez aztertuko du, pieza bakoitzean sortzen diren gaiak eta galderak azalduz.

Performancea: Toda la noche ha llovido fuera - Elena Aitzkoa

Larunbatean, bisita gidatuaren ondoren, Elena Aitzkoak itxiko du programa publikoa Toda la noche ha llovido fuera performancearekin: erakusketa-aretoan egingo den ekintza kantatua. Aitzkoak, bere interbentzio poetiko eta gestualengatik ezaguna den artistak, esperientzia murgiltzailea eskainiko du, narratiba sentikor batean musika, gorputza eta espazioa uztartuz.

Igandera arte

Eduardo Chillidaren (Donostia, 1924-2002) mendeurrenaren ospakizunen baitan sortutako Topalekuak erakusketa igandera arte egongo da ikusgai. Soledad Gutiérrez komisario eta ikertzailearen gidaritzapean, Tabakalerak Eduardo Chillidaren obra artistikoan murgiltzera gonbidatu zituen tokiko zein nazioarteko artistak, hainbat diziplinatan dihardutenak, Chillidaren lanarekin hartu-emanean pieza berriak sortzeko. Erakusketan biltzen diren lanak artista hauenak dira: Elena Aitzkoa, Josu Bilbao, Laia Estruch, Sheroanawe Hakihiiwe, Juf (Bea Ortega Botas eta Leto Ybarra), Christian Salablanca Díaz, Marianna Simnett eta Eduardo Chillida berarenak.