Frantziako hiriburuko Louvre-ko lehendakari-zuzendari Laurence des Cars-en aholkulari denak, Barthélemy Glama-Etchegoyen, Baionako Bonnat-Helleu museoko zuzendaritza hartuko du otsailean. "Bihotzaren hautua da; euskalduna naiz eta museoa oso ongi ezagutzen dut, azaldu dio Journal des Arts aldizkariari."

Frantziako École normale supérieure-ko ikasle ohia da Barthélemy Glama-Etchegoyen (32 urte). Estatu Batuetako New York-eko Columbia unibertsitatean irakasten hasi zen eta bertan bukatu zuen bere tesia: Arkeologia koloniala eta haren eragina Parisko Louvre Museoaren bildumetan. Berezitasun horregatik hainbat misio bete zituen New York-eko Frantziako Enbaxadaren kultur zerbitzuetan (2018-2020), Frantziako Defentsa ministerioko kabinetean, non Kultura, Memoria eta ikerketa aholkulari-orde izan baitzen (2015-2016), baita New York-eko Metropolitan Museum of Art-eko argitalpen zerbitzuetan.

Irakaslea luzaz izan da Journal des Arts frantses aldizkariko berriemailea Estatu Batuetan (New York) bertako museo eta galerietako erakusketen berri emanez. Teknologia berrien zalea izanik, NFT-en (token ez-suntsikor/NFT) hazkundea eta neurri bateko gainbehera hurbiletik segitu ditu.

Bonnat-Helleu museoarentzako une garrantzitsuan hartuko du zuzendaritza. 2011 hetsi zuten handitze eta modernizatze lanen egiteko (orotara 7 000 m2 izanen ditu, alboan zuen lehen mailako eskola bereganaturik) eta aurtengo udazkenean ireki behar lituzke ateak. "Poz berezia dut "Euskal Herriko Louvre txikiaren" berpiztean parte hartzeagatik" azaldu du.

Lanen denboran museoak bi zuzendari izan ditu. Lehena, Sophie Harent, 2018an joan zen Frantziako Dijon hiriko Magnin museora, eta haren segida hartu zuen Benjamin Couilleaux-ren zuzendaritza ez zuten luzatu 2022tik aurrera. Ondotik, Baionako Euskal Museoko Sabine Cazenave zuzendariak du lanen behin-behineko jarraipena egin.

Baionan egonik ere Barthélemy Glama-Etchegoyenek ez luke Parisko Louvre museotik urrundu behar. Izan ere, Parisko museoak, bere eskualdeenganako politika dela-eta, izari handiko partaidetza izenpetu zuen 2023an Bonnat-Helleu museoarekin. Bonnat-Helleu museoak 1922az geroztik jadanik Frantziako edozein eskualdek baino Louvreko obra gehiago zituen gordailuan. Gordailuak museoaren bilduma aberasten du, bereziki marrazki-bulegoarekin, non ikus baitaitezke, besteak beste, Leonardo da Vincik eta Michelangelok izenpetutako orriak.

Louvre eta Bonnat-Helleu museoen arteko 5 urteko lankidetza hitzarmenari esker, proiektu berriak gauzatuko dira, hala nola, behin-behineko erakusketak eta zuzendaritza-partekatuko akordioak. Euskaldunek bihotzean daramaten museo bat berpiztera doaz, Ipar Euskal Herriak ez baitzuen arte-ederren museorik 2011an hetsi zutenetik.