Berez, Josephine Gail Kleinberg izenez sortu zen 1927an Seattle hirian, eta aurtengo urtarrilaren 21ean hil da, 95 urte zituela, Pace Gallery-k jakitera eman duenez. 1960 urteetan, New Yorken, Jo Baer mugimendu minimalistaren ordezkarietako gisa ezagun egin zen, Donald Judd (1928-1994) artistarekin batera. Bere lanetako ezaugarria zen oihal zuria marra beltzez zedarritzen zituela, taularen geometria azpimarratzeko. 1964an erakutsi ziren lehen aldiz New Yorkeko Kaymar Gallery-n.

1970ko hamarkadan New York utzi eta Europara joan zen, lehenik Irlandan kokatuz eta ondotik Amsterdamen. Orduan, margolan figuratibo onirismodunei ekin zien. Motibo lausotuek eta elkarren artean fusionatutakoek, ornamentuzkoaren mugan, ihes egiten diote begiradari. Minimalista garaian bezalaxe, artistak beti nahi izan dio lanari hutsune bat utzi, ikusleak bere irudia eraikitzeko aukera ukan dezan.

Jo Baerrek gorakada bizkorra izan du, hasi eta berehala. 1968an, haren obrak Casselgo Documenta 4 nazioarteko erakusketan zeuden ikusgai, baita New Yorkeko Solomon R. Guggenheim Museum-eko "Systemic Painting" margolan abstraktuei buruzko erakusketan ere, 1966an.

Munduko erakustoki ospetsuenetan erakutsia izan da, hala nola New Yorkeko Whitney Museum of American Art (1975), New Yorkeko Dia Center for the Arts (2002), Koloniako Museum Ludwig (2013) eta Londresko Camden Arts Centre (2015). Bere obrak ospe handiko instituzioetan daude bilduma iraunkorretan, besteak beste Londresko MoMA eta Tate Gallery-n.