Laster izango dute arabarrek Bakoren buru entzutetsua zuzenean ikusteko aukera.Istorio aldrebesa izan du 1976an Arkaiako aztarnategian agertu zen buruak. Izan ere, aurkitu eta berehala, arrastorik utzi gabe desagertu zen, eta ez zen haren berririk izan hurrengo 46 urteetan, harik eta 2022an ezustean berriro agertu zen arte. Harekin batera, desagerpenaren arrazoia ere argitu zen: Jon Buesa EAJko goi kargu izandakoak —alderdi horren Arabako Batzar Nagusietako eleduna izatera iritsi zen— zeukan etxean pieza arkeologikoa. 1976an, Arabako Foru Aldundiaren obretarako ingeniaria zen Buesa, eta lanbide horren jardunean hartu zuen burua.

Pieza aldundiari itzultzera derrigortu zuen justiziak Buesa, baina geroztik epaitegietako prozesu administratiboan korapilaturik egon da Bakoren burua. Izan ere, Bibat museoko iturriek adierazi dutenez, pieza barruan zuen kutxak "hilabete asko" zeramatzan museoan, baina ez zuten hura irekitzeko beharrezkoa zen baimen judizialik jaso, "sarritan eskatuagatik" ere. Azkenik, aste honetan iritsi zaie epaitegiko agiria, eta asteartean ireki zuten kutxa. Estatua ahalik eta lasterren jendaurrean erakusteko asmoa dute Bibat museoan.

Zortzi zentimetroko zabalera eta hamabi zentimetro pasatxoko garaiera ditu piezak. Burua osorik gorde ez bada ere, Arabako ondarearen pieza bereziki garrantzitsua da II. mendeko eskultura zatia, lurraldean aurkitu den erromatarren garaiko piezarik esanguratsuenetako bat delako. Figura bizardun bat irudikatzen du, eta, identifikazioa ziurra ez bada ere, ezagun egin da Bakorekin, ardoaren jainko erromatarrarekin, lotzen duen teoria, hura ere sarri bizardun irudikatzen baitzuten. "Egoera kaxkarrean" heldu da pieza museora, urte askoan alde batetik bestera ibili ostean, eta aldundiko errestaurazio zerbitzuen esku geratu da orain, piezaren egoera baloratzeko. "Pare bat hilabete barru" jendaurrean erakusteko moduan egongo dela espero dute.