Artium Museoak Juana Cima. Begirada disidente bat aurkeztu du, bizi-jarrera batera hurbiltzea proposatzen duen erakusketa, Karibeko memoriaren, euskal testuinguruko prestakuntzaren eta espiritualtasunaren arteko elkargunean taxututako ibilbide baten esplorazioa, hirurogeita hamarreko hamarkadaren amaieratik nortasunari, ekologiari eta generoari buruzko funtsezko eztabaidak aurreratzen dituena. Ahots berezia da Juana Fernández Cimarena (Caibarién, Kuba, 1951), disidentzia erradikal eta poetikoko unibertso estetikoak eraikitzen dituena, sorkuntza eta bizitza elkartuz, banaezin bihurtu arte.

Ikusgarritasun publiko handieneko aldian (1977-1997), haren lanak hainbat bildumatan sartu ziren —besteak beste, Eusko Jaurlaritzaren, Bizkaiko Foru Aldundiaren eta Gasteizko Udalarenetan—. Baina bere lanaren askatasun formalak, arlo afektiboko zintzotasunak eta identitatearen azterketan kontzesiorik ezak kanon nagusiaren bazterrean kokatu zuten. Erakusketen zirkuitutik —ez, ordea, ekoizpenetik— nahita erretiratu ondoren, haren lana pixkanaka narratiba hegemonikotik kanpo geratu zen. Gabezia hori agerian uztea da erakusketa honen helburuetako bat.

Bost lurraldetan antolaturik (Bilbo. Lehena, desioaren eta aldarrikapenaren lurraldea; Lurralde mitikoak eta kontzientzia ekofeminista; Uharte-nortasuna eta mediterraneoko jakintzak; Bide espirituala Indian eta budismoan zehar eta Erretiroa mendian), erakusketak ibilbide bat egiten du artistaren ekoizpenean zehar. Haren lanean bestearekiko (gizaki, animalia edo landare) harreman-etika sakon bat islatzen da, alteritatetik sortua eta haren praktika osoa zeharkatzen duena, pentsamendua, existentzia eta sorkuntza elkartuz.

Juana Cimak (Caibarién, Kuba, 1951) Oviedon hasi zuen bere heziketa artistikoa. Arte Aplikatuen Goi Eskolan ikasi eta prestakuntza Higinio del Vallerekin egin ondoren, 1975ean Bilboko Arte Ederren Goi Eskolan sartu zen, eta Pinturan eta Grabatuan espezializatu zen. 1987an lortu zuen Lizentziatura, zentroa Fakultate bihurtu ondoren.Haren jarduera artistiko handieneko aldia 1977 eta 1997 bitartean izan zen. Garai horretan, Euskal Herriko lehiaketa garrantzitsuetan parte hartu eta aintzatespen garrantzitsuak jaso zituen; hala, bere proiekzio profesionala sendotu zuen. Laurogeiko hamarkadaren hasieran, Bizkaiko Emakumeen Asanbladarekin lan egin zuen, mugimendu feministaren ikonografiari ekarpen nabarmena eginez. Aldi berean, irakasle-karrera zabala egin zuen UPV/EHUn 1981etik 2014ra, Irakasle Eskolan lehendabizi eta, ondoren, Leioako Arte Ederren Fakultatean. 1997an, erakusketa-zirkuitutik erretiratu eta etapa akademikoa amaitu ondoren, mendiko estudio batera joan zen, eta han lanean jarraitzen du, modu pribatuago eta independenteagoan.

Erakusketa hau dela eta, Artium Museoak #Hitzak saileko beste ale bat argitaratu du, artistaren ibilbideari buruzko testu luze batekin, erakusketaren komisario Garazi Ansa-Arbelaizek (Oiartzun, 1989) sinatua.

Museoaren A3 aretoan abuztuaren 30era arte ikusgai egongo den erakusketaren inaugurazioa bihar izango da, larunbata, 12:00etan, eta ez dago erreserbarik egin beharrik.