Gerediaga Elkarteak eta Durangoko Udalak zazpigarren urtez abian jarriko dute Durangoko Azokan emango duten SORMEN BEKA DA. Egitasmoaren helburua euskarazko sorkuntza sustatzea eta sortzaile berriei bidea erraztuz euren lana ezagutzera ematea da.

2024ko deialdia, esku-hartze artistikoei zuzendutakoa izango da. Azken urteetan, Durangoko Azokak Durangoko Arte eta Historia Museoan ere ekitaldiak antolatu ditu. Deialdi honetako sormen bekarako proposamenak museoan edo/eta museo inguruan egiteko esku-hartzeak izan beharko dira, horretarako edozein diziplina aintzat hartuta: piktorikoa, eskultorikoa, ikus-entzunezkoa, performatiboa, e.a. Lanak, beste aldetik, "Euskara Jendea" izango du gaitzat.

Sarituko den proposamena, 2025ean Durangoko Arte eta Historia Museoan eskaintzea da helburua.

Aurreko sei edizioetan, literatura, musika, ikus-entzunezko, proiektu digitalak, arte eszenikoa eta familia transmisioan eragiteko proposamenak saritu dira.

Lana aurkezterakoan kontuan izan behar dena

Jatorrizko sormen lana izan behar da.

Hitzak barne dituen sormen lana bada, euskaraz izan behar da.

Lana esku-hartze artistikoa izango da edozein diziplina edo diziplina arteko uztarketatik sortutakoa: piktorikoa, eskultorikoa, ikus-entzunezkoa, performatiboa, e.a.

Sorkuntza lana bera eta emaitza nola plazaratuko den jaso beharko dira aurkezten den proposamenean, kontuan hartuta, Durangoko Museoa (barrua zein kanpoko ingurunea) kokaleku izango duela.

Esku-hartze artistikorako gaia "Euskara Jendea" izango da.

Sorkuntza Bekaren onuradunak

Bakarkako lana edo talde lana izan daiteke. Lanen bat taldean aurkezten bada, taldeak pertsona bakarra aukeratuko du taldearen ordezkari.

Eskatzaile bakoitzak proiektu bakarra aurkez dezake.

Eskatzaileak 18 urtetik gora eduki beharko ditu eskabidea egiterakoan.

Eskatzailea sortzaile berria izan behar da eta euskaraz komunikatzeko gaitasuna izan behar du.

Taldeen kasuan, talde sortu berria izan beharko da eta partaideen 2/3 sortzaile berriak izan behar dira.

Sortzaile berria zer den: aurkezten duen proposamena bere lehen edo bigarren esku-hartze artistikoa izatea (taldean egindako esku-hartzeak kanpo daude). Talde modura aurkeztu ezkero, talde horren lehen edo bigarren esku-hartze artistikoa izan behar da.

Zuzenean edo zeharka giza eskubideak urratzen dituen edozein proposamen ez da onartuko.

Sorkuntza Bekaren zenbatekoa

Bekaren zenbatekoa honakoa izango da: 15.000 €, sorkuntza eta plazaratzea barne (produkzioa, instalazioa, e.a.)

Proiektu bakarrari emango zaio diru-laguntza eta hori lehiaketa bidez aukeratuko da. Epaimahaiak aurkeztutako proiektuen artean nahikoa kalitate ez dagoela ikusiko balu, beka ez ematea erabaki dezake.