Eduardo Chillidaren jaiotza ospatzen den urtean, Tabakalerak eta Hauser & Wirth Menorcak indarrak batu dituzte jarduera-programa bateratu bat antolatzeko irailean, Menorca uhartean. Hala, Tabakalerako Topalekuak erakusketari ꟷChillidaren lana praktika artistiko garaikidetik irakurtzea proposatzen duen egitasmoariꟷ Chillida en Menorca elkartuko zaio. 2024ko maiatzetik urriaren amaierara arte egongo da irekita erakusketa eta orain aurkeztutako jardueren programa berri hau hartzeko testuingurua izango da.

Irailaren 14an eta 21ean, Elena Aitzkoak eta Nora Aurrekoetxeak beren proposamen garaikideak aurkeztuko dituzte Menorcan, euskal artista hauen lanen eta Eduardo Chillidaren ondarearen arteko elkarrizketa bat eskaintzeko.

Tabakaleraren eta Hauser & Wirthen arteko lankidetza honi esker, Chillidaren ondare artistikoaren gaineko begirada berriak aurkitzeko eta egungo euskal eskulturaren jarrera berriekin lotzeko Tabakalerak garatutako lanak presentzia berezia izango du Menorcako zentroak eskultoreari eskaini dion erakusketan.

Elena Aitzkoa (Apodaka, 1984) eta Nora Aurrekoetxea (Bilbo, 1989) izen garrantzitsuenetariko bi dira egungo euskal eszena artistikoan. Biek jaso dute Gure Artea saria: Aitzkoak 2015ean eta Aurrekoetxeak 2022an. Aurten, Aitzkoak eta Aurrekoetxeak eskulturari eskainitako erakusketa banatan parte hartu dute Tabakaleran: Elena Aitzkoak Topalekuak-en parte hartzen du, arte garaikidearen eta Eduardo Chillidaren ondarearen arteko lotura aztertzen duen proiektuan; urtearen hasieran, berriz, Nora Aurrekoetxeak Larruak eta izurrak-en parte hartu zuen, gorputzaren eta eskulturaren arteko harremana ardatz hartutako erakusketan.

Hauser & Wirth Menorcako erakusketa-aretoan, Elena Aitzkoak "Pistilos de una fuente" aurkeztuko du; Chillidaren eskulturekin elkarrizketan, gorputzaren, espazioaren eta materiaren arteko interakzioa aztertzen duen performancea. Ahotsaren, poesiaren, kantuaren eta mugimenduaren bidez, eskultorearen obrarekiko konexio sakon bat ahalbidetzea du helburu Aitzkoak.

Nora Aurrekoetxeak, bestalde, Chillidaren forma bereizgarrietan oinarritutako tailerra eskainiko du. Eskultura, performancea eta idazkera automatikoa uztartzen dituen "Mugimendua eta idazketa automatikoa" lantegiak aukera emango die parte-hartzaileei gorputzaren, espazioaren eta materiaren arteko interakzioarekin esperimentatzeko, altzarien bidez.

Bi jarduerak doakoak dira eta aldez aurretik izena eman behar da Hauser & Wirth Menorcaren webgunean. Isla del Rey uhartera iristeko ferryrako lekua eta txartela erreserbatu daitezke, Hauser & Wirth Menorcaren webgunetik ere.

Topalekuak: jarduera-programa

Tabakaleran urrira arte dago zabalik Topalekuak, Eduardo Chillidaren ondarearen interpretazio garaikidea eskaintzeko erakusketa. Intuizioa, metodo artistiko gisa, eta artearen eta ingurune naturalaren arteko konexioa nabarmentzen ditu eta Chillidaren eta Euskal Herriko eta nazioarteko artisten lanak biltzen ditu, eskultorearen ondarearen eta egungo praktika artistikoen arteko elkarrizketari bidea emateko.

Erakusketaren oinarri hartuta, Tabakalerak hainbat jarduera publiko antolatu ditu: bisita solasaldiak (irailaren 4an, irailaren 18an eta urriaren 2an); arte garaikidera hurbiltzeko Arte-Makina ikastaroa (irailaren 26an), Kanpoko Bulegoa kolektiboak zuzendua; eta Sonografia Irudipenak - Urteaga kontzertua (irailaren 14an), Garazi Navasek eta Manu Gaignek interpretatua. Kontzertuak euskal geografia esploratzen du soinuzko eboluzio baten bidez, grabazio zaharrak eta egungoak erabilita.

Erakusketa ixteko, Sokasalto pieza aktibatuko du Juf kolektiboak (Bea Ortega Botas eta Leto Ybarra); Soledad Gutiérrez komisarioak bisita gidatu bat eskainiko du eta Elena Aitzkoaren performance bat ere izango da bertan, "Toda la noche ha llovido fuera" izenburua duena.

Euskal artista parte hartzaileak

Elena Aitzkoa (Apodaka, 1984). Bere praktikak eskultura, marrazkia, poesia, performancea eta zinea hartzen ditu. Zenbait proiektutan nabarmendu da, tartean Ur Aitzak (2022-2024), baita erakusketa indibidualetan ere, besteak beste La Panera Arte Zentroan (Lleida) eta Patio Herreriano Museoan (Valladolid). 2015ean Gure Artea saria jaso zuen. Bere lana nazioarteko espazioetan erakutsi da, esaterako Reina Sofía Museoan (Madril), Sonic Circuits Jaialdian (Washington) eta Tabakalera Nazioarteko Kultura Zentroan.

Nora Aurrekoetxea Etxebarria (Bilbo, 1989). Gaur egun Holandan bizi da. Arte Ederretan lizentziatua Euskal Herriko Unibertsitatean (2013), Eskultura masterra osatu zuen Royal College of Arten (2017-2019). OKELA sormen lantegiaren sortzailea da, eta ibilbide nabarmena egina du egonaldietan eta sarietan, Gure Artea saria barne, 2022an. Bere obra nazioarteko galeria eta museoetan erakutsi da, eta CA2M (Madril) eta Botín Zentroaren (Santander) bilduman dago.