2024ko Ekoiztu deialdiaren estudio modalitatean garatutako lanak biltzen ditu erakusketak. Artistek, aurtengo lehen seihilekoan garatutako ikerketa- eta produkzio-prozesuen emaitzak aurkezten dituzte.

Ekoiztu egitasmoak proiektu artistikoak garatzeko laguntzen deialdi baten parte da, Uharte Zentroak eskaintzen duen egonaldi- eta baliabide-programa osatzeko. Laguntza horien bidez, arte-ekoizpena bultzatu nahi da, arte-komunitateko eragileek Uharte Zentroaren esparruan harremanak izan, zalantzan jarri, lankidetzan jardun eta iker dezaten.

Artistek honako testu hauek partekatu dituzte beren lanak aurkezteko:

Oihane Mcguinness Armendarizen Shakaurrera bidean, nahi gabe, adi

– Izan zenari itxarotea – zera ulertu nion: orainaldian etorriko den zerbaiti (baina izan zenari) itxarotea.

Itzulera bat? Galdetzen dut.

Sekula egondako toki batera itzultzea. Jarraitu zuen – zerbait gure zain zegoen. –

Mendi bera da, hor dago oraindik.

Nahiz eta pentsatzen dudan batzuetan tokia ez dela ezer, espazio hutsa, inora ez doan bidea eta denbora geldia. Hainbeste galtzeak ez du esan nahi bueltan zerbait aurkitu behar denik, mendian orein hura bezala, bere begiek ni ikusi aurretik.

Hona itzuli naiz konturatu gabe, kontuz.

Keinu batera itzuli naiz, baina oraingoan ez dira bere eskuak izango, nireak dira.

Orainaldia bukatu gabeko hainbat geruzadun emaitza izan liteke, arkeologia, memoria eta errelatoak, iraganari aditzen diotenak eta hemen egoteko forma berriak bilatzen dituztenak, erne, Shakaur-en, mendia.

Maite Redondo Gazteluren gerturik, urrunetik eguzkia.

Eguzkia badoa. Saiatzen naiz kokatzen, baina trena azkarrago doa, helmugara iritsi behar du. Beste irudi batek aurrekoa ordezkatzen du, atzean dagoena ikustea eragozten duten zuhaitzez betea. Orban lauso, abstraktu bat, marra eta kolore multzo bat.

Orduan, espazio ireki bat, begirada ortzi-mugara iristen da. Lehenik eta behin, pertsona batek uzta jasotzen du. Atzean geratzen da eta hainbat eraikinek hartzen dute ikuseremua. Bat-batean, mugimendua eten eta irudiak dar-dar egiten du.

Mireya Martín Larumberen N.N Nomen nescio

Eta horrela infinituraino.

Gaztetasunaren ziurtasuna zeharo erorita, gorputzaren beraren irmotasunak bultzatu nau gu kide garen eta ezagutzen ez nuen antzinako zibilizazio horretarantz bidaia egitera.

Bidean, Tanizakirengandik maileguan hartu nuen beldurretako baten barruan aurkitu naiz: ilunpeak ezkutatzen eta bizi duen sotiltasunaren argitzea.

Sarritan pentsatzen dut Robert Fluddek unibertsoa irudikatzeko aski izan zuen karratu beltz xumeaz, eta konturatzen naiz nitaz hitz egiteko ez dela jada nahikoa plano autobiografikora iristea, eta ulertzen dut bide hau ez dela amaitzen.

Et sic in infinitum.

Ekoiztu deialdia

Deialdi honetan hautatutako artistek 3000 €-ko laguntza jaso dute beren proiektua garatzeko, eta 2024ko otsailetik ekainera arte aritu dira lanean Uharte Zentroko estudio espazioetan. Denbora horretan, artista bakoitzari egokitutako profesional bana izan dituzte ondoan laguntza moduan. Hauek dira profesionalak: Alicia G. Hierro, Maider Oleaga eta Arantza Santesteban, hurrenez hurren, Mireya Martín Larumbe, Oihane Mcguinness Armendariz eta Maite Redondo Gazteluren prozesuak lagundu dituztenak. Gainera, egoitza garaian, Zentroan eskuragarri dauden baliabide tekniko eta teknologikoak erabiltzeko aukera izan dute.

Prozesuari amaiera emateko eta beren proiektua erakusteko asmoz, azaroaren 15ean erakusketa inauguratu zuten artisten bisita gidatu baten eskutik. Erakusketa Uharte Zentroko bigarren solairuan ikusgai izango da 2025eko otsailaren 16ra arte.

Erakusketa aste barruan bisitatzeko, aldez aurretik coordinacion@centrohuarte.es helbidera idatzi behar da. Ostiraletan, 18:00etatik 20:00etara, eta larunbat eta jaiegunetan 10:30etatik 14:30etara.