Tabakalerak Artearen, Zientziaren, Teknologiaren eta Gizartearen (AZTG) esparruan ikerketa, sorkuntza eta profesionalizazioa sustatzeko nazioarteko egonaldien deialdiaren bigarren edizioa iragarri du. Oraingo honetan, nabarmentzekoa da Madrilgo Goethe Institutuarekin eta Sónar+D-rekin abiatutako lankidetza estrategikoa. Sónar+D sormen-industrien, berrikuntzaren eta teknologiaren artean partekatutako espazioak aztertzen dituen Sonar jaialdiaren atala da, hain zuzen ere.

Diziplinarteko sorkuntzarako bultzada

Deialdi honekin, Tabakalerak sormen-prozesuekin daukan konpromisoa indartuko du, laguntza integrala emanez maila kontzeptualean eta teknikoan. Zientzia eta Teknologia Kuantikoen Nazioarteko Urtearekin bat eginez, ekimenak lehentasuna emango die artearen eta aurrerapen kuantikoekin arteko elkarrizketaren ahalmena aztertzen duten proiektuei, hausnarketarako eta esperimentaziorako bide berriak irekiz.

Sónar-Tabakalera: arte garaikidearen ikusgarritasuna handitzeko lankidetza

Edizio honen berrikuntza nagusietako bat Sónar jaialdiarekin ezarritako lankidetza estua da. Akordio horri esker, egonaldi-deialdian hautatutako proiektuetako bat gutxienez Sónar+D espazioan, Bartzelonan, aurkeztuko da 2025eko ekainaren 12tik 14ra bitartean. Gainera, aukeratutako proposamenek aldez aurretik proiekzio-plataforma bat izango dute ekainaren 6an eta 7an Tabakaleran (Donostian) egingo den Immaterial Jaialdian.

Deialdia 2025eko otsailaren 3ra arte zabalik

Deialdia AZTG ardatzean interesa duten Estatuko eta nazioarteko artistei zuzenduta dago. Lau proiektu hautatuko dira, eta horietako bat gutxienez euskal arte-testuinguruari lotuta egongo da eta beste bat testuinguru alemaniarrari, Tabakalerak eta Madrilgo Goethe Institutuak kultur trukea sustatzeko duten konpromisoaren ildotik.

Egonaldiak 2025eko apirilaren 28tik ekainaren 8ra bitartean egingo dira Tabakaleraren instalazioetan, eta sei asteko iraupena izango dute. Hautatutako artistek baliabide teknikoak, laguntza artistikoa eta diru-zuzkidura izango dute euren proiektuak ekoizten laguntzeko.

Ebaluazio-batzordea Tabakaleraren eta Sónar+D programaren ordezkariek osatuko dute, eta, batzorde horrek, besteak beste, proiektuen originaltasuna, kalitatea eta bideragarritasuna baloratuko ditu, bai eta diziplinarteko elkarrizketari eta AZTG testuinguruari egiten dieten ekarpena ere. Proposamenak aurkezteko epea otsailaren 3an amaituko da, eta interesa dutenek Tabakaleraren webgunearen bidez eman behar dute izena.