Nafarroako Museoak bere erakusketa iraunkor osoa ireki du berriz, 2024ko abenduan hasi eta 2025ean amaitutako energia-eraginkortasuneko lehen faseko lanak bukatu ondoren. Obra hauek, 2,24 milioi euroko aurrekontuarekin eta Next Generation EU funtsen bidez finantzatu dira. Proiektua M.ª del Olmo Íñigo Íñigo arkitektoak zuzendu du.

Kultura, Kirol eta Turismo kontseilaria, Rebeca Esnaola, berrirekieran izan da, eta nabarmendu du egindako esku-hartzeak "Nafarroako ondare kulturala baldintza hobeetan zaindu eta herritarrei modu irisgarrian eskaintzeko" helburua duela. Museoak, lanek iraun duten bitartean zabalik jarraitu du eta programazio zabal bat eskaini du, publikoaren sarbidea bermatuta.

Urtebeteko itxialdi partzialaren ondoren, museoak aretoak garbitu eta egokitu ditu, domotika-sistema berriak doitzearekin batera. Halaber, kartelak eta testu azalpenak eguneratu ditu, eta areto batzuk berrantolatu, hala nola Orizko jauregiko horma-margoen gunea edo estatua togatua ikusgai dagoen aretoa. Gainera, lau hizkuntzatan egindako areto-fitxa berria prestatu dute, Irulegiko Eskua, Loizuko Gizona eta estatua togatua barne hartzen dituen ibilbide gidatu batekin.

Berrirekierarekin batera, bi aldi baterako erakusketa txiki jarri dira martxan: "Visible web" (3.8 aretoa), museoko bildumen katalogazioaren bilakaera azaltzen duena, eta Carlos Cánovas argazkilariaren "Natura eta kontrola" serieko bi lan (4.2 aretoa).

Itxialdi partziala izan arren, Museoaren 2025eko datuak oso onak omen dira: 51.143 bisitari eta 9.533 erabiltzaile jarduera eta zerbitzuetan, guztira 60.676 pertsona, iaz baino %15 gehiago.

Bigarren fasea, martxan

Museoak bigarren faseko lanak ere abiarazi ditu, 820.000 euroko finantzaketarekin. Helburua da bulego eraikinaren eta behe solairuaren kanpoko arotzeria berritzea, energia-eraginkortasuna hobetzeko. Obra hauek ere Construcciones Leache S.L. enpresari esleitu zaizkio eta 2026ko ekainera arte iraungo dute. Ez dute museoko jarduera publikoa baldintzatuko, eta sarrera doakoa izango da martxoaren 1era arte.

2026rako programazio zabala

2026rako aurkeztu duten programazioak aldi baterako erakusketa ugari biltzen ditu. Otsailetik irailera, kobrezko lingote multzo berezia eta Ceda-La Celadako Brontze Aroko zeramika erakutsiko dira. Martxotik abuztura, arte garaikideko azken erosketei eskainitako erakusketa izango da ikusgai. Maiatzean, kapera María Azkarateren Tercer paisaje instalazio multisentsorialarekin beteko da, 2027ra arte.

Udako hilabeteetan Sanferminetako argazki-liburuak protagonista izango dira, eta urritik urtebetez "Paisaiaren aldakiak" erakusketa inauguratuko da. Irailean, Koldo Sebastiánen Physis lana eta Teo Sabando artistari eskainitako monografikoa iritsiko dira. Urrian, Iruñeko Topaketen programako ekintza berezi bat hartuko du Museoak.

Hezkuntza-programak eta kultura ikastaroak ere mantenduko dira, bai eta uda garaian egiten den "9 Eguzki" programa ere.