Arte Ederren Bilboko Museoaren programa aitzindaria da, 2012tik "ukimenezko bisita" integratzen duena bizipen museografikoan, bildumako artelanak erliebean erreproduzitzen dituen gailu baten bidez. Ikusteko desgaitasuna duten pertsonei bideratutako proposamenarekin batera, Ukitzeko Artea programak ikasle guztientzako sentsibilizazio-esperientzia sentsorial bat ere eskaintzen du. Jarduera hezkuntza-arloko langileek zuzentzen dute, eta, haren osagarri, laguntza-materialak eta euskarazko, gaztelaniazko eta ingelesezko audiogidak daude. Gerora, Ukitzeko Artea programa beste museo batzuek ere berenganatu dute, hala nola Pradokoak eta Thyssenek, Madrilen, eta Pushkinek, Moskun.

Lehen edizioetan, programa Arte Ederren Bilboko Museoan garatu zen, eta, 600 parte-hartzaile inguru jaso ondoren, Hezkuntza Sailak haren irismena museotik harago zabaltzea erabaki zuen. Hartara, gailuaren ibiltaritza hasi zen Bizkaiko eta Gipuzkoako ikastetxeetan barna. Museoak 2018tik egiten du bere hezkuntza-jarduera egoitzatik harago ere zabaltzeko lan hori, eta, ordutik hona, 32 ikastetxek eta 7.482 ikaslek parte hartu dute bertan.

Ukitzeko Arteak bere eskaintza handitu du. Horrenbestez, hasieran bost artelan zituen, eta gaur egun zortzi dira, horietako bat aurten gehitua. Panel-kopurua handitzeaz gain, berriki María Blanchard (Santander, 1881-Paris, 1932) gehitu izana hobekuntza kualitatiboa izan da emakumezko artisten ordezkaritzari dagokionez; kasu honetan, mugimendu kubistaren margolaririk garrantzitsuenetako batekin. Haren Femme assise (Emakumea eserita) lana —emakume baten adierazpen figuratiboa, plano fazetatuen kode kubistari jarraikiz egina— bereziki egokia da programa honetarako.

Hala, zortzi artelan horiek artearen historiako zenbait garai eta artista esanguratsutan zeharreko ibilbidea osatzen dute: Noeren kutxa Erromaniko katalaneko artelan bat da, XIII. mendearen azken herenean datatua; Grekoaren Deikundea eta José de Riberaren Emakume santuak San Sebastian sendatzen lanak Espainiako eskolari dagozkio; Barroko italiarreko margolana da Orazio Gentileschiren Lot eta bere alabak; Emakumea eserita haurra besoetan duela, Mary Cassattena, mugimendu inpresionistako margolari enblematikoenetako batena, alegia; Lying Figure in Mirror (Irudia etzanda ispiluan), Francis Baconena; Krabelin gorridun baserritar gaztea, Adolfo Guiard euskal artistarena; eta, gaurtik aurrera, Femme assise (Emakumea eserita), Maria Blanchardena.